آئی سی سی انڈر 19ورلڈ کپ کا فائنل کل بھارت اور انگلینڈ کے درمیان کھیلا جائے گا تاہم ورلڈکپ کے میگا ایونٹ سے قبل آئی سی سی نے سوشل میڈیا اکاؤنٹ پر دوران میچ عکس بند کیا گیا ایک دلچسپ لمحہ شائقین کے ساتھ شیئر کیا ہے۔
آئی سی سی کے سوشل میڈیا اکاؤنٹ پر طبی عملے کے 2 اراکین (ایک خاتون اور بھاری جسامت کے مرد) کی ایک مختصر سی ویڈیو شیئر کی گئی ہے جس میں دونوں افراد کو ضرورت پڑنے پر اسٹیڈیم میں داخل ہوتے دیکھا جا سکتا ہے۔
ویڈیو میں دیکھا جاسکتا ہے کہ عملے کے دونوں افراد اشتہاری بورڈ سے گزرتے ہوئے ایک ساتھ اسٹیڈیم میں داخل ہونے کی کوشش کر رہے ہیں تاہم بھاری جسامت کے مرد کو وزن زیادہ ہونے کے سبب داخل ہونے میں مشکلات کا سامنا ہے۔
خاتون اسمارٹ ہونے کے باعث مسکراتی ہوئی باآسانی داخل ہونے ہی والی تھی لیکن بھاری جسامت کا شخص بھاگتے ہوئے کسی فٹ بال کی مانند آیا اور اشتہاری بورڈ پاس کر گیا جس کی وجہ سے رکاوٹ سے گزرتی خاتون توازن نہ سنبھال سکی اور اسٹیڈیم میں گرگئی۔
اس دوران کمنٹیٹرز کا دلچسپ مکالمہ سنا جاسکتا ہے جبکہ ویڈیو کے اختتام میں بھاری جسامت کے شخص کو بال کے ساتھ کچھ مہارتیں کرتے بھی دیکھا جا سکتا ہے۔
