اسلام آباد (نمائندہ خصوصی )چیف الیکشن کمشنر سکندر سلطان راجہ نے نگران وزیراعلیٰ پنجاب کے تقرر کےلئے اجلاس (آج)اتوار کوطلب کر لیا۔ذرائع کے مطابق چیف الیکشن کمشنر نے نگران وزیراعلیٰ پنجاب کے تقرر کے لیے اجلاس (آج)اتوار کو طلب کر لیا ہے، اجلاس میں چیف الیکشن کمشنر اور ممبران شریک ہوں گے۔ذرائع کے مطابق چیف الیکشن کمشنر کی سربراہی میں ہونے والے اجلاس میں نگران وزیراعلیٰ کے ناموں پر غور کیا جائے گا، الیکشن کمیشن نگران وزیر اعلیٰ پنجاب کا اعلان (آج) اتوار کو ہی کرے گا۔یاد رہے کہ نگران وزیر اعلیٰ پنجاب کے تقرر کے لیے حکومت اور اپوزیشن کی جانب سے کسی ایک نام پر اتفاق نہ ہونے کے بعد معاملہ الیکشن کمیشن کے پاس پہنچا تھا۔دوسری جانب وزیراعلیٰ پنجاب چوہدری پرویز الٰہی نے گزشتہ روز میڈیا سے گفتگو کرتے ہوئے کہا تھا ہم چیف الیکشن کمشنر کا مقرر کردہ نگران وزیراعلیٰ پنجاب چلنے نہیں دیں گے، ہم نگران وزیراعلیٰ کے خلاف عدالت جائیں گے۔
