سنچورین۔(نمائندہ خصوصی):پاکستان کے ٹیسٹ کپتان شان مسعود نے کہا ہے کہ فاسٹ باؤلرز خرم شہزاد اور محمد عباس کی واپسی خوش آئند ہے، ہم جنوبی افریقہ میں بڑی کامیابیوں کے لیے پرعزم ہیں۔ اپنے ایک بیان میں انہوں نے کہا کہ جنوبی افریقہ کے خلاف خود کو جانچنے کے لیے بے تابی سے منتظر ہیں جو ہمیشہ سے دنیا کی سر فہرست ٹیموں میں سے ایک رہی ہے۔ انہوں نے کہا کہ ہمیں انگلینڈ کے خلاف ہوم ٹیسٹ سیریز اور حالیہ ون ڈے سیریز سے کچھ مومینٹم ملا ہے جس میں ہمارے ٹیسٹ اسکواڈ کے متعدد کھلاڑی شامل تھے ۔انہوں نے کہا کہ ہم جنوبی افریقہ میں بڑی کامیابیوں کے لیے پرعزم ہیں جو حریف ٹیموں کے لیے چند انتہائی سخت کنڈیشنز میں سے ایک سمجھی جاتی ہے۔ شان مسعود نے کہا کہ ہم جانتے ہیں کہ جنوبی افریقہ نے آئی سی سی ورلڈ ٹیسٹ چیمپئن شپ میں اچھی کارکردگی کا مظاہرہ کیا ہے لیکن ہم نے کم از کم دو ہفتے قبل یہاں پہنچنے کے بعد اس سیریز کے لیے بہترین انداز میں تیاری کی ہے۔پاکستان اور جنوبی افریقہ کےدرمیان دو ٹیسٹ میچوں کی سیریز کا پہلا
ٹیسٹ جمعرات (کل)سے سنچورین کے سپر اسپورٹ پارک میں شروع ہو گا، دوسرا ٹیسٹ آئندہ سال 3 سے 7 جنوری تک کیپ ٹاؤن میں کھیلا جائے گا، پاکستان ٹیم کو جنوبی افریقہ کے اس دورے میں ٹی 20 سیریز میں 0-2 سے شکست ہوئی تھی لیکن اس نے ون ڈے سیریز میں جنوبی افریقہ کی سر زمین پر 0-3 کا تاریخی وائٹ واش کیا جس کے بعد توقع کی جارہی ہے کہ آئی سی سی ورلڈ ٹیسٹ چیمپئن شپ کی یہ سیریز بھی دلچسپ اور سخت ہو گی، پاکستان نے اپنی آخری ٹیسٹ سیریز شان مسعود کی قیادت میں انگلینڈ کے خلاف دو ایک سے جیتی ہے، پاکستانی ٹیسٹ اسکواڈ 13 دسمبر کو جنوبی افریقہ پہنچا تاکہ اچھی تیاری اور مقامی حالات سے ہم آہنگ ہو سکیں۔ٹیسٹ اسکواڈ میں تجربہ کار فاسٹ باؤلر محمد عباس کی واپسی ہوئی ہے جنہوں نے آخری بار پاکستان کے لیے اگست 2021 میں ویسٹ انڈیز کے خلاف ٹیسٹ کھیلا تھا۔ انہوں نے اس سیزن میں قائد اعظم ٹرافی کے 5 میچوں میں 31 وکٹوں کی عمدہ کارکردگی کی وجہ سے ٹیسٹ اسکواڈ میں جگہ بنائی ہے،انجری کے باعث انگلینڈ کے خلاف تین میچوں کی ہوم ٹیسٹ سیریز سے باہر ہونے والے فاسٹ باؤلر خرم شہزاد کی بھی ٹیم میں واپسی ہوئی ہے۔ عاقب جاوید پاکستان مینز ٹیم کے عبوری ہیڈ کوچ ہیں اور گزشتہ ماہ زمبابوے کے خلاف وائٹ بال سیریز میں چارج سنبھالنے کے بعد یہ ان کی پہلی ریڈ بال سیریز ہو گی، پاکستان اور جنوبی افریقہ 1995 سے اب تک 12 ٹیسٹ سیریز کھیل چکے ہیں جن میں سے سات میں جنوبی افریقہ نے کامیابی حاصل کی ہے جبکہ دو میں پاکستان فتح یاب ہوا ہے، تین سیریز ڈرا ہوئی ہیں۔
فاسٹ باؤلرز خرم شہزاد اور محمد عباس کی واپسی خوش آئند ہے، ہم جنوبی افریقہ میں کامیابیوں کیلئے پرعزم ہیں، شان مسعود
