اسلام آباد (نمائندہ خصوصی )ملک بھر میں مردم شماری کا فیلڈ آپریشن 5 دن کے لیے بند کر دیا گیا جس کا نوٹیفکیشن جاری ہو گیا۔نوٹیفکیشن کے مطابق مردم شماری کا فیلڈ آپریشن عید کی چھٹیوں کے باعث بند کیا گیا ہے جو 21 سے 25 اپریل تک بند رہے گا۔نوٹیفکیشن میں کہا گیا کہ عید کی چھٹیوں کے بعد مردم شماری کا فیلڈ آپریشن شروع کیا جائے گا۔دوسری جانب ادارہ شماریات نے کہا کہ اب تک کی مردم شماری کے مطابق ملک کی آبادی 23 کروڑ 45 لاکھ سے تجاوز کر چکی ہے ۔ادارہ شماریات کے حکام نے کہا کہ ملک میں جاری مردم شماری کی تاریخ میں توسیع متوقع ہے، تاریخ میں توسیع کا اعلان عید بعد کیا جائے گا۔ایک بیان میں حکام نے کہا کہ مختلف اضلاع میں مردم شماری کے اعداد و شمار سے ادارہ شماریات خود مطمئن نہیں۔حکام کے مطابق مردم شماری کی تاریخ میں توسیع کراچی، جیک آباد، بلوچستان دیگراضلاع میں متوقع ہے۔ادارہ شماریات کے حکام نے کہا کہ مردم شماری کی تاریخ میں توسیع کا فیصلہ احسن اقبال کی عمرہ ادائیگی کے باعث نہ ہو سکا۔
