کراچی(نمائندہ خصوصی مغربی ہواﺅں کا ایک تازہ سلسلہ 28 مارچ سے مغربی بلوچستان میں داخل ہونے کا امکان ہے جس کے باعث بدھ کو کراچی میں ہلکی اور درمیانی شدت کی بارش کا امکان ہے۔محکمہ موسمیات نے 28 سے 31مارچ کے دوران تیز ہواﺅں اور بارش کی پیش گوئی کی ہے جس کے مطابق مغربی ہوائیں منگل کو ملک کے مغربی علاقوں میں داخل ہوں گی۔ مغربی ہوائیں 29مارچ کو ملک کے بالائی اور وسطی علاقوں تک پھیل جائیں گی جو 31مارچ تک موجود رہیں گی۔موسمیاتی تجزیہ کار جواد میمن نے کہا کہ سسٹم کے زیر اثر کہیں معتدل اور کہیں ہلکی بارش کا امکان ہے۔جواد میمن نے کہا کہ کراچی کے مضافات میں اس سسٹم کے زیر اثر ژالہ باری بھی ہو سکتی ہے۔انہوں نے بتایاکہ کراچی میں سمندری ہواﺅں کی رفتار کم ہے،پیرکو دن کا درجہ حرارت 34 ڈگری سینٹی گریڈ ریکارڈ کیاگیا۔انہوں نے کہا کہ مغربی ہواﺅں کے سلسلے کے باعث کراچی میں ہواﺅں کا رخ مغرب اور شمال مشرق رہ سکتا ہے، ہواﺅں کا سلسلہ 28 مارچ سے ملک پر اثر انداز ہو سکتا ہے۔جواد میمن نے کہا کہ سسٹم کے زیر اثر 2 اپریل تک ملک کے بیشتر مقامات پر بارش اور بالائی علاقوں میں برفباری متوقع ہے۔
