وزیراعظم سے اسلام آباد میں قطر کے سفیر کی ملاقات

اسلام آباد( نمائندہ خصوصی )وزیر اعظم محمد شہباز شریف سے قطر کے سفیر شیخ سعود بن عبدالرحمن بن فیصل الثانی کی آج اسلام آباد میں ملاقات. ملاقات میں قطر کے سفیر نے قطر اور پاکستان کے درمیان برادرانہ تعلقات کو بڑھانے کے لیے کی جانے والی مختلف سرگرمیوں سے آگاہ کیا۔
وزیر اعظم محمد شہباز شریف نے دونوں ممالک کے درمیان مشترکہ اقدار پر مبنی برادرانہ تعلقات کا اعادہ کیا۔ انہوں نے ان مضبوط تعلقات کو باہمی طور پر فائدہ مند اقتصادی تعلقات میں تبدیل کرنے کے لیے دونوں اطراف کے باہمی عزم کا ذکر کیا۔ وزیراعظم نے 2022 میں تاریخی سیلاب کے نتیجے میں پاکستانی عوام کی انسانی ہمدردی کی بنیاد پر امداد پر قطر کا شکریہ ادا کیا۔ قطری سفیر نے برادرانہ دوطرفہ تعلقات کو مزید فروغ دینے پر وزیراعظم کا شکریہ ادا کیا اور اس سلسلے میں قطر کی جانب سے تعاون کا یقین دلایا۔قطر تقریباً 250,000 پاکستانیوں کی میزبانی کرتا ہے، جو دونوں ممالک کی ترقی میں اہم کردار ادا کر رہا ہے۔ اس سال پاکستان اور قطر کے درمیان سفارتی تعلقات کے قیام کی 50ویں سالگرہ ہے۔ دونوں ممالک اس سالگرہ کو بہترین انداز میں منانے کے لیے پرعزم ہیں۔