رینٹ اے پیر ہر آمر کو کرائے پر دستیاب رہا ہے، وزیر خارجہ بن گیا لیکن مریدوں سے ایزی لوڈ لینے پہنچ جاتا ہے۔ نثار کھوڑو

کراچی( نمائندہ خصوصی) پاکستان پیپلز پارٹی سندھ کے صدر نثار احمد کھوڑو نے پی ٹی آئی کے سلیکٹڈ وزراء کی جانب سے مٹھی اور عمرکوٹ میں پی پی پی کے خلاف ہرزہ سرائی کا دوٹوک جواب دیتے ہوئے کہا ہے کہ کرایے پر درکار سیاسی یتیموں کا ٹولہ آجکل گلی محلوں میں خاک چھانتا پھرتا ہے۔ رینٹ اے پیر ہر آمر کو کرائے پر دستیاب رہا ہے، وزیر خارجہ بن گیا لیکن مریدوں سے ایزی لوڈ لینے پہنچ جاتا ہے۔ اپنے جاری کردہ بیان میں نثار احمد کھوڑو نے کہا کہ عمرکوٹ اور تھرپارکر کی عوام کا ایک ہی نعرہ ہے کہ پیر کا نہ میر کا، ووٹ بینظیر کا۔ انہوں نے کہا کہ عمرکوٹ نے شاہ محمود قریشی کو الیکشن میں 62 ہزار ووٹوں سے تاریخی شکست سے ہمکنار کیا تھا۔ نثار احمد کھوڑو کا کہنا تھا کہ تھر کے ایک یتیم سیاسی وڈیرے کی خود اپنی پارٹی میں حیثیت یہ ہے کہ ‘تم کون۔۔۔۔۔۔۔۔۔۔۔ میں خوامخواہ۔ انہوں نے کہا کہ ارباب غلام رحیم تھری عوام کے ہاتھوں 2018ع کے الیکشن اور ضمنی انتخابات میں ہار چکا، آئندہ الیکشن میں ہیٹ ٹرک بنائے گا۔ انہوں نے مزید کہا کہ ارباب غلام رحیم پاکستان پیپلز پارٹی سے ایم پی اے کا ایک ٹکٹ لینے کے لئے ابھی تک سفارشیں کروا رہا ہے۔ نثار احمد کھوڑو نے کہا کہ عمران خان نے وعدہ ایک کروڑ نوکریوں اور 50 لاکھ گھروں کا کیا، لیکن عوام کو مہنگائی اور بیروزگاری کے علاوہ کچھ نہیں دیا۔ اب عوام کا ایک ہی مطالبہ ہے کے وزیراعظم عمران خان ملک اور عوام کی جان چھوڑیں ورنہ عمران خان کا حشر بھی آمر پرویز مشرف جیسا ہونے والہ ہے۔