کوئٹہ( کرائم رپورٹر )
صوبائی دارالحکومت میں 80سالہ ریٹائر ٹیچر کی گھر سے رسیوں سے بندھی لاش برآمد ‘ بھائی نے قتل کا شبہ ظاہر کردیا ۔پولیس ذرائع کے مطابق شیر علی اسٹریٹ میکانگی روڈ کوئٹہ کے رہائشی عزیز احمد نے رپورٹ درج کرائی ہے کہ وہ اور اس کی ہمشیرہ غیر شادی شدہ ہیں اور وہ دونوں اکیلے رہتے ہیں میری ہمشیرہ مختیار بیگم رات کو اپنے کمرے میں سونے کی غرض سے چلی گئی ان کے کمرے میں ٹی وی چل رہا تھا جس کی آواز بہت اونچی ہو گئی جس پرانہوں نے اپنا کمرہ کھول کر ہمشیرہ کے کمرے میں جانا چاہا تو میرا کمرہ کھل نہیں رہا تھا باہر سے کسی نے کنڈی لگا دی تھی پھر میں دوسرے دروازے سے نکل کر کمرے میں گیا تو دیکھا کہ میری ہمشیرہ کی لاش رسیوں سے بندھی ہوئی ہے جس پر میں نے رسیاں کھولیں ۔انہوں نے مزید بتایا کہ ہماری کسی سے ذاتی دشمنی نہیں مگر ہمارا ایک ذاتی گھر اور صرافہ بازار میں دو دکانیں ہیں جن پر لینڈ مافیا کی نظریں لگی ہوئی ہیں جس پرشبہ ہے کہ لینڈ مافیا کی جانب سے میری بہن کو جائیداد ہتھیانے کی غرض سے قتل کیا گیا ۔ پولیس نے مقدمہ درج کر کے تفتیش شروع کردی ہے۔
