اسلام آباد(نمائندہ خصوصی) وزیر اعظم محمد شہباز شریف نے شام کے وزیر اعظم حسین آرنوس کو ٹیلیفون کرکے شام میں زلزلے سے شدید جانی اور مالی نقصان پر گہرے دکھ اور افسوس کا اظہار کیاہے۔وزیراعظم آفس سے جاری بیان کے مطابق وزیر اعظم نے حسین آرنوس کی ہمشیرہ، ان کے گیارہ بچوں اور پوتوں اور نواسوں کی ہلاکت پر تعزیت اظہار کیا، ان کی بلندی درجات اور سوگواران کیلئے صبر جمیل کی دعا کی۔ وزیر اعظم نے کہا کہ پاکستان کی حکومت اور عوام شام میں آنے والے شدید زلزلے میں قیمتی جانوں کے المناک نقصان اور املاک کو بڑے پیمانے پر نقصان پر گہرے رنج و غم میں مبتلا ہیں۔ وزیر اعظم شہباز شریف نے پاکستان کی طرف سے شام کے زلزلہ زدگان کیلئے امدادی کاوشوں کے بارے آگاہ کرتے ہوئے کہاکہ میں نے فوری طور پر اپنے متعلقہ اداروں کو ہدایت کی کہ اس مشکل وقت میں ہم اپنے شامی بھائیوں کو ہر ممکن مدد اور تعاون فراہم کریں اور شام میں پاکستان کے سفیر اس سلسلے میں شامی حکام کے ساتھ قریبی رابطے میں ہیں۔وزیراعظم نے بتایاکہ پاکستان پہلے ہی زلزلہ زدگان کیلئے امداد پر مشتمل ایک خصوصی طیارہ شام بھیج چکا ہے جس میں خیمے، گرم کپڑے اور کمبل شامل ہیں،اسکے علاوہ زخمیوں کو طبی امداد فراہم کرنے کےلئے پاکستان کی ایک طبی ٹیم بھی بہت جلد شام پہنچنے گی۔ انہوں نے کہاکہ پاکستان کی طرف سے بہت جلد شام کے زلزلہ زدگان کیلئے امدادی سامان سے بھرے ٹرکوں پر مشتمل قافلہ بھی روانہ کیا جائے گا۔وزیر اعظم نے شامی وزیرِ اعظم کو یقین دلایا کہ مشکل وقت پاکستان اپنے شامی بہن بھائیوں کی ہرممکن مدد کرے گا۔
