کراچی(نمائندہ خصوصی) وزیراعلی سندھ سید مراد علی شاہ نے شہرقائد کو اسٹریٹ کرمنلز سے پاک کرنے کے لئے آئی جی پولیس کو ہدایت دیتے ہوئے کہاہے کہ ایس ایس یو اور ریزرو پولیس کو ضلعی پولیس کی مدد کے لیے سڑکوں پر متحرک کریں۔ انہوں نے کہا کہ میں چاہتا ہوں کہ سٹی پولیس اسٹریٹ کرائم کے خاتمے کو اپنا مشن بنائے۔ ، آئی جی پولیس کو ہدایت دیتے انہوں نے کہا کہ ناکامی کی صورت میں متعلقہ ایس ایس پی اور ایس ایچ اوز کو فوری طور پر تبدیل کیا جائے۔ وزیر اعلی سندھ نے آئی جی کو ہدایت کی کہ ہاٹ سپاٹ پر پولیس، ریزرو اور ایس ایس یو فورس کو تعینات کیا جائے اور چوکس رہنے کے لیے پولیس کا گشت بڑھایا جائے اور ان کی تصاویر اور مقام کے ساتھ ساتھ تعیناتی کا منصوبہ بھی ان کے ساتھ شیئر کرتے رہیں۔ انہوں نے آئی جی کو یہ بھی ہدایت دی کہ مجرموں کے خلاف کی جانے والی کارروائیوں کے ساتھ ساتھ ان کی گرفتاریوں کی تعداد کے بارے میں بھی مجھے آگاہ کیا جائے تاکہ پراسیکیوشن ڈپارٹمنٹ کو انہیں کیفرکردار تک پہنچانے کے لیے ضروری ہدایات دی جا سکیں۔ سید مراد علی شاہ نے آئی جی پولیس کو ہدایت کی کہ وہ عادی مجرموں، اسٹریٹ کرمنلز، منشیات فروشوں کے خلاف کریک ڈان کو تیز کریں۔ وزیراعلی سندھ نے کہا کہ کراچی کی عوام پہلے ہی دہشت گردوں کے ساتھ ساتھ دیگر جرائم پیشہ افراد کے ہاتھوں امن و امان کی خراب صورتحال اور تباہی دیکھ چکے ہیں۔ انہوں نے کہا کہ پولیس اور دیگر قانون نافذ کرنے والے اداروں کی جانب سے اپنے فرض کی ادائیگی میں بہت سی قربانیوں کے بعد حکومت نے کراچی والوں کے تعاون سے امن و امان بحال کیا۔ انہوں نے مزید کہا کہ اب اس شہر کے لوگوں کو اسٹریٹ کرمنلز کے رحم و کرم پر نہیں چھوڑا جاسکتا اور ہمیں سب کو مل کر اسٹریٹ کرائم کا خاتمہ کرکے شہریوں میں تحفظ کا احساس پیدا کرنا ہوگا۔ وزیراعلی سندھ کی ہدایت پر انسپکٹر جنرل آف پولیس غلام نبی میمن نے سٹی پولیس، ایس ایس یو اور ریزرو فورسز کو پولیس کی مدد میں متحرک ہونے کے لیے ضروری ہدایات جاری کردیں۔
