اسلام آباد( بیورو رپورٹ )وفاقی وزیر برائے ماحولیاتی تبدیلی سینیٹر شیری رحمان نے کہا ہے کہ بلاول مودی کو دنیا کے سامنے بے نقاب کررہے ہیں ،عمران خان ابھی بھی کہہ رہے کہ مودی ہی مسئلہ کشمیر حل کر سکتا ہے۔اپنے بیان میں شیری رحمن نے کہاکہ ایک طرف چیرمین بلاول بھٹو زرداری نریندر مودی کو دنیا کے سامنے بے نقاب کر رہے، دوسری طرف عمران خان ابھی بھی مودی کی تعریفیں کر رہے۔ انہوںنے کہاکہ عمران خان ابھی بھی کہہ رہے کہ مودی ہی مسئلہ کشمیر حل کر سکتا ہے، عمران خان شاید 5 اگست 2019 کا سیاہ ترین دن بھول گئے ہیں؟ عمران خان نے مودی کی انتخابات میں کامیابی کی دعا کی۔ شیری رحمن نے کہاکہ عمران خان کی حکومت کے دوران ہی مودی نے آرٹیکل 370 اور 35 کو ختم کرکے کشمیر کی خصوصی حیثیت پر حملہ کیا، عمران حکومت کے سامنے اس عالمی تنازعہ کی نوعیت تبدیل کرنی کی کوشش کی گئی۔ وفاقی وزیر نے کہاکہ انہوں نے ایک منٹ کی خاموشی کے علاوہ کچھ نہیں کیا، اب وزیر خارجہ نریندر مودی کو عالمی دنیا کے سامنے گجرات کا قصائی کہا ہے تو عمران خان پھر مودی کے دفاع میں اتر آئے ہیں۔ وفاقی وزیر نے کہاکہ بھارتیہ جنتا پارٹی کے لیڈر چیئرمین بلاول بھٹو زرداری کے سر کی قیمت لگا رہے لیکن وزیر خارجہ عمران خان کی طرح خاموشی اختیار نہیں کرےنگے۔
