لاہور(بیورو رپورٹ ) پاکستان پیپلز پارٹی کے شریک چیئرمین آصف علی زرداری نے کہا ہے کہ آنے والا وقت انارکی اور انتشار کی سیاست کرنے والی قوتوں کا متحمل نہیں ہوسکتا،پیپلزپارٹی پاکستان میں آئین کی بالادستی پارلیمان کی بقا ءاور غریب کی فتح تک اپنی جہدوجہد جاری رکھے گی، سیاسی نظام کی بقا ءکے بھٹو مشن کو پورا کریں گے، پنجاب اسمبلی کو بچانے کی جہدوجہد جاری رکھےںگے۔آصف علی زرداری کی زیر صدارت پنجاب کی پارلیمانی پارٹی کا اجلاس بلاول ہاﺅس لاہور میں منعقد ہوگا۔ پارلیمانی لیڈر سید حسن مرتضی کی قیادت میں پیپلز پارٹی کے اراکین اسمبلی نے اجلاس میں شرکت کی ۔آصف علی زرداری نے پارلیمانی پارٹی کے اراکین کو وزیر اعظم شہبازشریف اور چوہدری شجاعت سے ہونے والی ملاقاتوں پر اعتماد میں لیا۔اجلاس میں پنجاب کی سیاسی صورتحال کا جائزہ لیا گیااورپی ڈی ایم کے ساتھ چلنے کافیصلہ کیا گیا ۔آصف علی زرداری نے کہا کہ جمہوری استحکام اور پارلیمان کی بالادستی کے لئے ہر قربانی کے لئے تیار ہیں ، آنے والا وقت انارکی اور انتشار کی سیاست کرنے والی قوتوں کا متحمل نہیں ہوسکتا۔سید حسن مرتضیٰ نے گفتگو کرتے ہوئے کہا کہ سیاست ممکنات کا کھیل ہے، آصف علی زرداری ممکنات کی سیاست کے ماہر ہیں ،جمہوری قوتیں آپ کی طرف دیکھ رہی ہیں۔اجلاس میں پیپلز پارٹی پنجاب کی پارلیمانی پارٹی نے آصف علی زرداری کی قیادت پر مکمل اعتماد کا اظہارکیا۔اجلاس میں پیپلز پارٹی جنوبی پنجاب کے صدر مخدوم احمد محمود بھی موجود تھے۔
