لاہور(بیورو رپورٹ ) پنجاب اسمبلی کا اجلاس مقررہ وقت کی بجائے 4گھنٹے کی غیر معمولی تاخیر سے شروع ہوا ،ایوان میں دی یونیورسٹی آف ٹوبہ ٹیک سنگھ بل 2022 پیش کیا گیا جسے متعلقہ قائمہ کمیٹی کے سپرد کر کے دو ماہ کے اندر رپورٹ پیش کرنے کی ہدایت کر دی گئی، اجلاس میں مختلف محکمہ جات کی سالانہ رپورٹس بھی پیش کی گئیں۔ پنجاب اسمبلی کا اجلاس مقررہ وقت دو بجے کی بجائے چار گھنٹے کی تاخیر سے پینل آف چیئرمین میاں محمد شفیع کی صدارت میں شروع ہوا۔ اجلاس میں لوکل حکومت اینڈ کمیونٹی ڈویلپمنٹ ڈیپارٹمنٹ سے متعلق سوالات دریافت ہونے تھے تاہم صوبائی وزیر میاں محمود الرشید کی عدم موجودگی کی وجہ سے وقفہ سوالات موخر کر دئیے گئے۔اجلاس میں صوبائی وزیر پارلیمانی امور محمد بشارت راجہ نے دی یونیورسٹی آف ٹوبہ ٹیک سنگھ بل 2022 ایوان میں پیش کیا جسے چیئر مین متعلقہ قائمہ کمیٹی کے سپرد کر کے دو ماہ کے اندر رپورٹ پیش کرنے کی ہدایت کی۔ اجلاس میں نکتہ اعتراض پر بات کرتے ہوئے صوبائی وزیر راجہ بشارت نے کہا کہ لاہور میں سموگ کی وجہ سے ماحول بہت متاثر ہو رہاہے ،سموگ کے باعث ہیوی ٹریفک کی ٹائمنگ مقرر کردی گئی ہے، دھواں چھوڑنے والی گاڑیوں کے خلاف کارروائیاں کی جارہی ہیں جبکہ دھواں چھوڑنے والی درجنوں فیکٹریاں سیل کرکے جرمانہ بھی کئے گئے ہیں،بھٹوں کو زیادہ سے زیادہ زک زیگ ٹیکنالوجی پر منتقل کررہے ہیں،فصلوں کی باقیات کو آگ لگائی جاتی ہے تو ذمہ دار ڈپٹی کمشنر کو قرار دیاجاتا رہا،۔اجلاس میں پنجاب پبلک سروس کمیشن کی سالانہ رپورٹس 2019-21ایوان میں پیش کردی گئیں، گوجرانوالہ ملتان، فیصل آباد، راولپنڈی ، بہاولپور اور فورٹ منرو ڈویلپمنٹ اتھارٹیز کی سالانہ رپورٹس ، نیشنل فنانس کمیشن ایوارڈ کے نفاذ کی ششماہی مانیٹرنگ رپورٹ 2018-2019، انفراسٹرکچر ڈویلپمنٹ اتھارٹی پنجاب کی سالانہ رپورٹ 2017 ، کمیشن برائے حیثیت نسواں پنجاب کی سالانہ رپورٹس برائے سال 2017-20 ،دانش سکولز اینڈ سنٹرز آف ایکسلینس اتھارٹی کی سالانہ کارکردگی رپورٹ برائے سال 2019-20 ،پنشن فنڈ پنجاب کی رپورٹ برائے سال 2017-18،جنرل پروویڈنٹ انویسٹمنٹ فنڈ پنجاب کی سالانہ رپورٹ 2017-18 اورمحتسب پنجاب کی سالانہ رپورٹ برائے سال 2020-21 ایوان میں پیش کردی گئی۔نکتہ اعتراض پر بات کرتے ہوئے مولانا الیاس چ چنیوٹی نے کہا کہ چنیوٹ فیصل آباد روڈ کی تعمیر تعطل کا شکار ہے، بجٹ کو سکیم میں شامل کیاجائے۔خلیل طاہر سندھو اور طارق گل نے نکتہ اعتراض پر بات کرتے ہوئے کہا کہ کرسمس کے موقع پر مسیحی بھائیوں کو تنخواہیں نہیں دی جا رہیں ،ہم لوگ سو رہے ہوتے ہیں اور وہ ہماری خدمت کررہے ہوتے ہیں ،شہروں کو صاف ستھرا رکھنے میں ان کا اہم کردار ہے ،فوری طور پر تنخواہیں ادا کی جائیں جس پر صوبائی وزیر راجہ بشارت نے یقین دہانی کرائی کہ ایک دو روز میں تنخواہیں ادا کردی جائیں گی۔ایجنڈا مکمل ہونے پرپینل آف چیئرمین نے پنجاب اسمبلی کا اجلاس آج منگل دوپہر 2 بجے تک ملتوی کردیا
