اسلام آباد( نمائندہ خصوصی)پانچویں میری ٹائم سیکیورٹی ورکشاپ کے شرکاء نے نیول ہیڈکوارٹرز اسلام آباد کا دورہ کیا۔ وفد کی قیادت کمانڈنٹ پاکستان نیوی وار کالج ریئر ایڈمرل جاوید اقبال کررہےتھے ورکشاپ کے شرکاء کو پاک بحریہ کے چیلنجز اور لائحہ عمل بشمول بلیواکانومی کے فروغ میں پاک بحریہ کے کردار پر بریفنگ دی گئی۔چیف آف دی نیول اسٹاف ایڈمرل محمد امجد خان نیازی نےورکشاپ کے شرکاء سے بات چیت کی۔شرکاء سے خطاب کرتے ہوئے امیر البحر نے بحری سیکیورٹی سے متعلق امور اور ملک میں میری ٹائم آگاہی کے لیے پاک بحریہ کی کوششوں پر روشنی ڈالی۔نیول چیف نے سمندری اور ساحلی سیکیورٹی کو بڑھانے, آپریشنل تیاریوں اور ساحلی آبادی کی سماجی و اقتصادی ترقی میں پاک بحریہ کے اقدامات سے متعلق شرکاء کو آگاہ کیا۔ میری ٹائم سیکیورٹی ورکشاپ کے شرکاء میں سینیٹرز, اراکین پارلیمنٹ, پالیسی میکرز, بیوروکریٹس, ماہرین تعلیم, تاجر برادری اور میڈیا کے نمائندے شامل تھے۔ شرکاء نے ملک کو درپیش میری ٹائم چیلنجز کا کامیابی سے سدباب کرنے پر پاک بحریہ کے کردار اور کوششوں کو بےحد سراہا اور قیمتی تجاویز بھی پیش کیں۔
