اسلام آباد(نمائندہ خصوصی ) اسلام آباد کی سیشن عدالت نے پاکستان تحریک انصاف کے رہنما سینیٹر اعظم سواتی کا مزید 4 روزہ جسمانی ریمانڈ منظور کر لیا۔تفصیلات کے مطابق ڈسٹرکٹ اینڈ سیشن کورٹ اسلام آباد میں اداروں کے خلاف ٹویٹ اور بیان بازی سے متعلق کیس کی سماعت ہوئی۔سینئرسول جج محمد شبیر نے کیس کی سماعت کی، سینیٹر اعظم خان سواتی کو جسمانی ریمانڈ مکمل ہونے پر دوبارہ سیشن کورٹ میں پیش کیا گیا۔ایف آئی اے کے اسکیل نے استدعا کی کہ ایف آئی اے کو مزید چھ دن کا ریمانڈ دیا جائے، موبائل اور ٹویٹ اکاونٹ کے حوالے سے مزید تفتیش کرنی ہے۔بابر اعوان نے عدالت سے استدعا کی کہ اعظم سواتی کو سیکیورٹی خدشات کے پیش نظر پیش نہ کیا جائے۔عدالت نے اعظم سواتی کے جسمانی ریمانڈ میں 3 دسمبر تک توسیع دیتے ہوئے پیشی سے استثنیٰ کی درخواست منظور کرلی۔جج محمد شبیر نے کہا کہ اعظم سواتی کو آئندہ سماعت پر بھی عدالت میں پیش نہ کیا جائے۔جج کا کہنا تھا کہ اعظم سواتی ویڈیو لنک کے ذریعے عدالت میں پیش ہوں گے، آئندہ حکم تک اعظم سواتی کو عدالت میں پیش نہ کیا جائےیاد رہے دو روز قبل عدالت نے اعظم سواتی کا دو روزہ جسمانی ریمانڈ منظور کیا تھا۔
