مانسہرہ ( نمائندہ خصوصی)پاکستان ڈیمو کریٹک الائنس کے سربراہ مولانا فضل الرحمان نے کہا ہے کہ ہم نے ملک کودیوالیہ ہونے سے بچالیا، پاکستان میں سیاسی ومعاشی استحکام بھی آئے گا۔جلسہ سے خطاب کرتے ہوئے مولانا فضل الرحمان نے کہا کہ ملک میں پہلے سیاسی افراتفری پیدا کی گئی۔انہوںنے کہاکہ 2018 میں دھاندلی کے ذریعے جعلی حکومت مسلط کی گئی جس کی وجہ سے معیشت کی کشتی زرکاب ہونے لگی۔سربراہ جے یو آئی نے کہا کہ ہم نے ریاست کی سالمیت اوراس کی حفاظت کی جنگ لڑی ہے۔انہوںنے کہاکہ پاکستان دیوالیہ ہونے کے قریب کھڑا تھا،آج ہم ایک بڑے بحران سے نکلے ہیں۔ انہوںنے کہاکہ پاکستان گرے لسٹ سے نکل آیا ہے،ملک دلدل میں تھا دلدل سے نکلنا آسان کام نہیں۔مولانا فضل الرحمان نے عمران خان پر تنقید کرتے ہوئے کہا کہ فارن فنڈنگ کوچھپایا گیا، الیکشن کمیشن نے آپ کوچورکہا،تمہارے خلاف سب کچھ ثابت ہوچکا ہے۔ تم لوگوں سے کیا کیا چھپاﺅگے۔انہوں نے کہا کہ جے یوآئی(ف)عوام کے حقوق کی آوازہے۔ کہا جارہا ہے کہ قومی حکومت آنی چاہیے۔ انہوں نے کہاکہ ان قوتوں کوبتانا چاہتا ہوں آج ملک میں ایک قومی حکومت ہے۔
