راولپنڈی( بیورورپورٹ ) آرمی چیف جنرل قمر جاوید باجوہ نے کہا ہے کہ جوان قوم کی خدمت کے لیے پورے جذبے کے ساتھ فرائض انجام دیں۔پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ نے لاہور گیریژن کا دورہ کیا، آرمی چیف نے یادگار شہدا پر حاضری دی، فاتحہ خوانی کی اور پھول چڑھائے۔ترجمان پاک فوج نے کہا کہ آرمی چیف نے لاہور کور اور پنجاب رینجرز کے افسران اور جوانوں سے بات چیت کی اور ان کے فرض سے لگن کی تعریف کی۔جنرل قمر جاوید باجوہ نے الوداعی خطاب میں جوانوں کی پیشہ ورانہ مہارت اور لگن کو سراہا۔آئی ایس پی آر کے مطابق آرمی چیف نے خصوصی بچوں کےلئے انسٹیٹیوٹ کا بھی افتتاح کیا اور دورے کے دوران جدید ترین ہاکی ایرینا کا بھی افتتاح کیا۔ان کی آمد پر کور کمانڈر لیفٹیننٹ جنرل سلمان فیاض نے ان کا استقبال کیا۔ترجمان پاک فوج کے مطابق آرمی چیف جنرل قمر جاوید باجوہ نے ہاکی کے معروف کھلاڑیوں سے بھی تبادلہ خیال کیا۔ انہوں نے کہا کہ نوجوان پاکستان کا اثاثہ ہیں، کھیلوں میں نمایاں مقام کا حصول سازگار ماحول کی فراہمی سے جڑا ہے۔
