لندن( اسپورٹس ڈیسک ) سری لنکا کے سابق کپتان اور مایہ ناز بلے باز مہیلا جے وردھنے نے پاکستان کے لیجنڈ فاسٹ بائولر وسیم اکرم کو اپنے کیریئر میں اب تک کا سب سے مشکل فاسٹ باؤلر قرار دیا ہے۔
پاکستان کرکٹ ٹیم کے سابق کپتان اور مایہ ناز آل رائونڈر وسیم اکرم کو ٹیسٹ اور ون ڈے فارمیٹس میں مجموعی طور پر 916 بین الاقوامی ر وکٹیں حاصل کرنے کا اعزاز حاصل ہے۔ انٹرنیشنل کرکٹ کونسل (آئی سی سی) کے ڈیجیٹل شو میں گفتگو کرتے ہوئے 45 سالہ سابق سری لنکن کپتان نے کہا کہ پاکستانی پیسر وسیم اکرم کو کیرئیر کا سب سے مشکل بائولر سمجھتا ہوں، وہ ہمیشہ ایک قدم آگے ہوتے تھے۔
سابق سری لنکن کپتان نے اعتراف کیا کہ میں نے اپنے کیرئیر کا جب آغاز کیا تو وسیم اکرم شہرت کی بلندیوں پر تھے، ان کی باؤلنگ کا کسی بلےباز کے پاس کوئی جواب نہیں ہوتا تھا۔ وسیم اکرم کا ایکشن بیٹرز کو کسی بھی وقت شکست دینے کی صلاحیت رکھتا تھا۔
مہیلا جے وردھنے نے کہا کہ میں نے بین الاقوامی سطح پر 26 ہزار سے زائد رنز بنائے لیکن وسیم اکرم کے خلاف کھیلنا ہمیشہ مشکل رہا کیونکہ وہ دونوں طرف بال سوئنگ کرنے کی بھرپور صلاحیت رکھتے تھے اور یہی ان کی کوالٹی تھی۔ان کا سامنا کرنا ایک ڈراؤنا خواب تھا ۔
مہیلا جے وردھنے کو 149ٹیسٹ اور 448 ون ڈے میچوں میں سری لنکا کی نمائندگی کا اعزاز حاصل ہے۔ وسیم نے اپنے کیریئر کا اختتام 104 ٹیسٹ میچوں میں 23.62 کی اوسط سے 414 ٹیسٹ وکٹیں اور 356 میچوں ون ڈے میچز میں 23.52 کی اوسط سے 502 ون
ڈے وکٹوں کے ساتھ کیا۔
