کوئٹہ (نمائندہ خصوصی)
ترجمان حکومت بلوچستان فرح عظیم شاہ نے بلوچستان میں نو سال کے بعد بلدیاتی انتخابات کے کامیاب انعقاد کو صوبے کی ترقی اورشانداز جمہوری روایات سے تعبیر کیا ہے ۔ انہوں نے کہا کہ صوبے کے 34 میں سے 32 اضلاع میں ہونے والے انتخابات میں 17 ہزار سے ذائد امیدواروں نے حصہ لیا اور صرف کوئٹہ اور لسبیلہ میں حلقہ بندیاں مکمل نہ ہونے کے باعث اس مرحلے میں انتخابات نہ ہوسکے۔
فرح عظیم شاہ کا کہنا تھا کہ انتخابی عمل میں عوام کی بھرپور شرکت اور اس ضمن میں حکومت کی جانب سے اٹھائے گئے اقدمات کے دوررس نتائج سامنے ائیں گے اور اختیارات کی نچلی سطح تک منتقلی کے اس عمل سے عوام کے دیرینہ مسائل بھی حل ہوپائیں گے ۔
ترجمان حکومت بلوچستان کا کہنا تھا کہ بلدیاتی انتخابات میں ووٹرز کا ٹرن اوٹ تاریخی رہا اور ساوتھ بلوچستان کے اضلاع ، کیچ ، خاران ، پنجگور، واشک میں بھی 50 سے 55 فیصد عوام نے اپنا حق رائے دہی استعمال کیا۔
فرح عظیم شاہ نے بلدیاتی انتخابات میں 132 خواتین امدیواروں کی جنرل نشستوں پر انتخاب لڑنے کے عمل کو بھی بہترین تسلسل قرار دیا ان کا کہنا تھا کہ مخصوص نشستوں کے بجائے جنرل نشستوں پر خواتین امیدواروں کی جانب سے انتخاب لڑنے کا عمل ریاست کے زیر اہتمام انتخابی عمل پر بھرپور اعتماد کا مظہر ہے ۔
ترجمان حکومت بلوچستان نے کہا کہ انتخابات کے موقع پر بعض علاقوں میں شرپسند عناصر نے انتخابی عمل میں خلل ڈالنے کی کوشش مگر عوام نے ان کے مذموم عزائم خاک میں ملائے اور انہیں مسترد کیا ۔ انہوں نے کہا کہ نوجوانوں کی ایک بڑی تعداد نے بھی آج انتخابی عمل میں بھرپور شرکت کی اور ملک دشموں کے دباو میں انے کے بجائے اپنا آئینی و قانونی حق کا بھرپور استعمال کیا۔
ترجمان نے اس امر کو بھی قابل ذکر قرار دیا کہ شدید گرمی کی موجودہ لہر اور سفری سہولیات کی کمی بھی عوام کی انتخابی عمل میں بھرپور شرکت کو متاثر نہیں کر سکی۔
فرح عظیم شاہ کا کہنا تھا کہ بلدیاتی انتخابات میں پاک فوج، ایف سی بلوچستان اور دیگرقانون نافذ کرنے والے اداروں کی بہترین انتظامات کی بدولت مجموعی طور پر انتخابات پرامن رہے۔ صوبے میں انتخابات کے پر آمن اور شانداز انعقاد پر عوام نے بھی متعلقہ اداروں کی کارکردگی کو سراہا ہے ۔
