اسلام آباد (اے پی پی/ نیٹ نیوز):پاکستان نے کہاہے کہ امن دستوں میں سب سے زیادہ فوجی تعاون کرنے والے ممالک میں پاکستان سرفہرست کے ممالک میں شامل ہیں ، پاکستان دنیا میں تنازعات اوربحرانوں سے متاثرہ علاقوں میں سلامتی اور استحکام کو برقرار رکھنے میں امن دستوں کے اہم کردار کوقدرکی نگاہ سے دیکھتاہے۔
اتوارکویہاں جاری بیان میں ترجمان دفترخارجہ نے کہاکہ پاکستان آج عالمی برادری کے ساتھ مل کراقوام متحدہ کے امن دستوں کا عالمی دن منارہاہے ۔پاکستان امن دستوں میں سب سے زیادہ فوجی تعاون کرنے والے ممالک میں شامل ہیں ، پاکستان دنیا میں تنازعات اوربحرانوں سے متاثرہ علاقوں میں سلامتی اور استحکام کو برقرار رکھنے میں امن دستوں کے اہم کردار کوقدرکی نگاہ سے دیکھتا ہے ۔
ترجمان نے کہاکہ پاکستان اقوام متحدہ کے امن فوجیوں کی خدمات اور قربانیوں کو سلام پیش کرتاہے اور امن، استحکام اور تعاون کے مشترکہ نظریات کو آگے بڑھانے کے لیے اقوام متحدہ کے ساتھ کام جاری رکھنے کے اپنے عزم کا اعادہ کرتا ہے ۔پاکستان کو اقوام متحدہ کے امن مشن میں چھ دہائیوں پر محیط اپنی دیرینہ اور مسلسل شراکت پر فخر ہے۔
ترجمان نے کہاکہ1960 کے بعد سے پاکستان کے دولاکھ سے زیادہ مرد و خواتین نے دنیا کے تقریبا تمام براعظموں میں اقوام متحدہ کے 46 مشنز میں عزت، جرات اور بہادری کے ساتھ خدمات انجام دیں، پاکستانی امن فوجیوں نے پیشہ ورانہ مہارت اور لگن سے ہر اس مشن میں ، جہاں انہوں نے حصہ لیا ہے، خود کو ممتازثابت کیاہے ۔ پاکستان کے 169 امن فوجیوں نے بین الاقوامی امن اور سلامتی کے مقصد کے لیے فرائض سرانجام دینے کے دوران اپنی جانوں اورخون کے نذرانے پیش کئے ہیں ۔
ترجمان نے کہاکہ پاکستانی خواتین اقوام متحدہ کے امن دستوں میں تنازعات اور تنازعات کے بعد کے حالات میں مدد فراہم کرکے دنیا بھر کی خواتین کو متاثر کر رہی ہیں ۔ ہماری خواتین افسران کی ایک ٹیم اس وقت جمہوریہ کانگومیں اقوام متحدہ کے امن مشن میں پاکستان سے پہلی خواتین گروپ کے طور پر خدمات سرانجام انجام دے رہی ہے ، جو خطے میں کئی طرح کی خدمات فراہم کررہی ہے جن میں ماہرین نفسیات، سٹریس کونسلرز، پیشہ وارانہ تربیت دینے والی آفسران، جینڈرایڈوائیزرز، ڈاکٹرز ، نرسز، آپریشن آفیسرز، انفارمیشن آفیسرز، اورلاجسٹک آفسران شامل ہیں،
ان تعیناتیوں سے پائیدارامن اورترقی میں خواتین کے کلیدی کردارکے حوالہ سے پاکستان کے عزم کی عکاسی ہورہی ہے۔ ۔ ترجمان نے کہاکہ پیس کیپنگ اورقیام امن میں تسلسل کے ساتھ شرکت وحمایت سے پائیدارامن کیلئے پاکستان کی گہری وابستگی ظاہرہوتی ہے۔
ترجمان نے کہاکہ پاکستان اقوام متحدہ کے سب سے قدیم پیس کیپنگ مشن یونانئٹڈنیشنزملٹری آبزرورگروپ برائے بھارت وپاکستان( یواین ایم اوجی آئی پی) کی میزبانی اورسب سے زیادہ فوجی فراہم کرنے والاملک ہے جس نے قیام امن کو ایک منفرد پیش منظر فراہم کیاہے۔ ترجمان نے کہاکہ امن دستوں کے عالمی دن کے موقع پرپاکستان اپنے اس عزم کااعادہ کرتا ہے کہ اقوام متحدہ کے امن دستے بین الاقوامی امن اور سلامتی کو برقرار رکھنے کا سب سے موثرذریعہ ہے
