ملتان( اسپشل رپورٹر )رکن صوبائی اسمبلی مخدومزادہ زین حسین قریشی نے کہا ہے کہ ملتان کا سیوریج نظا م بوسیدہ ہو چکا ہے۔ جس کی تبدیلی کیلئے اربو ں روپے کی لاگت سے منصوبے پر کام جاری ہے۔جس کی تکمیل سے ملتان کے شہریوں کو سیوریج کے مسائل سے نجات ملے گی۔ ان خیالات کا اظہار انہوں نے گزشتہ روز ایم ڈی واسا ملتان کے ہمراہ سیوریج کے مسائل کے حوالے سے اجلاس کی صدارت کرتے ہوئے کیا۔ جس میں واسا کے افسران نے شرکت کی۔ مخدومزادہ زین حسین قریشی نے کہا کہ پی پی 217 میں سیوریج کے مسائل گھمبیر صورتحال اختیار کر چکے ہیں۔ مختلف یونین کونسلوں میں سیوریج سسٹم بوسیدہ ہو چکاہے اور پانی گلیوں میں کھڑا ہے۔ عوامی شکایات بہت زیادہ ہو چکی ہیں۔ جس کے حل کیلئے واسا افسران کے پاس حاضر ہوا ہوں۔
پی پی 217 میں مختلف یونین کونسلوں میں واسا کی ٹیموں کو بھیجا جائے‘ بوسید ہ پائپ لائنوں کو فوری طور پر تبدیل کیا جائے۔ ملتان میں حالیہ بارشوں کی وجہ سے جن جن علاقوں میں پانی کھڑا ہے ان علاقوں کو فوری طور پر کلیئر کیا جائے۔انہوں نے ایم ڈی واسااور دیگر افسران کو ہدایات جاری کیں کہ بارشوں کی وجہ سے عوام کو درپیش مسائل ترجیحی بنیادوں پر حل کرنے کیلئے مزید اقدامات اٹھائے جائیں۔اجلاس میں مون سون بارشوں کی وجہ سے عوام کو درپیش مسائل اور ان کے حل کیلئے اٹھائے گئے اقدامات پر بریفنگ دی گئی۔ گزشتہ روز ہونے والے اجلاس میں سابقہ اجلاس کے دوران زیر بحث آنے والے مسائل پر پیش رفت کا جائزہ لیا گیا۔ واسا حکام نے پچھلے اجلاس میں پیش کردہ مسائل پر پیش قدمی سے متعلق آگاہ کیا۔اور بتایاکہ سیوریج کے مسائل حل کرنے کیلئے بھر پور اقدامات کئے جا رہے ہیں۔ جن کا اگلے اجلاس میں جائزہ لیا جائے گا۔ انہوں نے کہا واسا کے مسائل کے حل کیلئے وقتاًفوقتاً اجلاسوں میں شریک ہونگا تاکہ ملتان سمیت اور بلخصوص پی پی 217 کے عوام کی واسا کے حوالے سے شکایات کا ازالہ کیا جائے