ملتان( اسپشل رپورٹر )
ملتان یونین آف جرنلسٹ کے وفد کی خبریں دفتر لاہور کا دورہ ،انتظامیہ نے30 اگست تک تمام صحافیوں اور میڈیا ورکرز کو تنخواہیں ادا کرنے کی یقین دہانی کروادی۔
ملتان یونین آف جرنلسٹ ملتان (برنا)کو صحافیوں اور میڈیا ورکرز کی جانب سے تنخواہیں نہ ملنے کی مسلسل شکایات موصول ہورہی تھیں جس پر ملتان یونین آف جرنلسٹ کے وفد نے صدر انجم خان پتافی اور سیکرٹری جنرل عدنان فاروق قریشی کی سربراہی میں خبریں آفس لاہور میں گروپ جنرل منیجر فرقان ہاشمی سے ملاقات کی اور روزنامہ خبریں ملتان کے صحافیوں اور میڈیا ورکرز کو اڑھائی ماہ سے تنخواہ نہ ملنے کی وجہ سے صحافیوں اور میڈیا ورکرز کو درپیش مسائل کے بارے میں آگاہ کیا۔وفد نے جنرل منیجر کو بتایا کہ بڑھتی ہوئی مہنگائی نے صحافیوں اور میڈیا ورکرز کی کمر توڑ کر رکھ دی ہے اور انکا گزراوقات مشکل ہوگیا ہے۔
ملاقات اڑھائی گھنٹے تک جاری رہی جس میں یونین کی جانب سے ورکرز کو فوری ادائیگی پر زور دیا گیا ۔ جس پر گروپ جنرل منیجر فرقان ہاشمی نے ملتان یونین آف جرنلسٹ کے وفد کو یقین دہانی کروائی کہ وہ 30 اگست تک صحافیوں اور تمام میڈیا ورکرز کو تنخواہیں ادا کرینگے۔وفد نے جنرل منیجر کو یہ بھی باور کرایا کہ اگر 30اگست تک تنخواہیں ادا نہ کی گئیں تو وہ خبریں کے خلاف احتجاج سمیت دیگر ذرائع اختیار کرنے پر مجبور ہو جائینگے۔وفد میں سینئر صحافی شریف جوئیہ اور شیخ نوید ناصر بھی ہمراہ تھے۔