اسلام آباد(نمائندہ خصوصی/نیٹ نیوز)وفاقی وزیر اطلاعات و نشریت مریم اور نگزیب نے جوہری دھماکوں کی سالگرہ پر قوم، قیادت اور سائنسدانوں کو مبارکباد پیش کرتے ہوئے کہا ہے کہ یوم تکبیر تاریخ کا سنہری اور یادگار دن ہے جب پاکستان نے اعلان کیا کہ اسے کوئی غلام نہیں بنا سکتا، یوم تکبیر اعلان تھا کہ پاکستان آزاد تھا، آزاد ہے اور آزاد رہے گا
فتہ کو یوم تکبیر کے موقع پر اپنے پیغام میں وفاقی وزیر اطلاعات نے ذوالفقار علی بھٹو سے نواز شریف تک قائدین کو سلام پیش کرتے ہوئے کہا کہ بھٹو شہید نے ایٹمی پروگرام کی بنیاد رکھی جبکہ نوازشریف نے اس کی تکمیل کی، نوازشریف نے دنیا پر ثابت کیا کہ ہمیں خریدا جاسکتا ہے نہ جھکایا جاسکتا ہے۔
انہوں نے کہا کہ جوہری پروگرام کا تسلسل پاکستان کے اپنے دفاع کے لئے کوئی سمجھوتہ نہ کرنے کا تاریخی ثبوت ہے۔ وفاقی وزیر اطلاعات نے کہا کہ جوہری پروگرام کو بنانے، پروان چڑھانے اور اس کا عملی اظہار کرنے والا ہر فرد قوم کا ہیرو ہے جسے سلام پیش کرتے ہیں۔
انہوں نے کہا کہ وزیراعظم شہباز شریف نے یوم تکبیر پر دس روزہ تقریبات کا اعلان کیا ہے، اتحاد کے جذبے سے یہ خوشی منائیں گے۔ وفاقی وزیر اطلاعات نے اس عزم کا اعادہ کیا کہ پاکستان کی آزادی، خودمختاری اور قومی مفادات پر کوئی سمجھوتہ نہیں ہوگا
انہوں نے کہا کہ یوم تکبیر کے موقع پر وزیراعظم شہباز شریف کا میثاق معیشت کا اعلان پاکستان کو حقیقی معاشی آزادی دلانے کی طرف تاریخی قدم ہے۔ انہوں نے کہا کہ آج کے دن ہم ایٹمی پروگرام کے معمار ڈاکٹر عبدالقدیر خان مرحوم، ان کی ٹیم اور تمام سائنسدانوں کو سلام پیش کرتے ہیں
