سنسناٹی(نیٹ نیوز)امریکہ کی شہرہ آفاق ٹینس سٹار ، سابق عالمی نمبر ایک اور23گرینڈ سلام ٹائٹلز کی فاتح سرینا ولیمز ڈبلیو ٹی اے سنسناٹی ماسٹرز ٹینس ویمزسنگلز کے ابتدائی راﺅنڈ میں ہارکر ایونٹ سے باہر ہوگئیں۔ برطانوی ٹینس سٹار اور یو ایس اوپن چیمپئن ایما راڈوکانونے سرینا ولیمز کو خواتین کے سنگلز مقابلوں کے ابتدائی راﺅنڈ میں شکست دی۔ ڈبلیو ٹی اے/اے ٹی پی سنسناٹی ماسٹرز اوپن ٹینس ٹورنامنٹ کے انتہائی دلچسپ اور کانٹے دار مقابلوں کا سلسلہ امریکا میں جاری ہے۔
خواتین کے سنگلز مقابلوں کے ابتدائی راﺅنڈ میں برطانوی ٹینس سٹار اور یو ایس اوپن چیمپئن ایما راڈوکانو شاندار کارکردگی کا مظاہرہ کرتے ہوئے سابق امریکی عالمی چیمپئن سرینا ولیمز کو بالکل بے بس کر دیا اور سٹریٹ سیٹس میں 4-6 اور 0-6 سے شکست دے کر نہ صرف فاتحانہ آغاز کیا بلکہ ٹورنامنٹ کے دوسرے راﺅنڈ کے لئے کوالیفائی کرلیا۔ سرینا ولیمز نے گزشتہ ہفتہ کو عندیہ دیا تھا کہ وہ رواں سال کے چوتھے گرینڈ سلام یو ایس اوپن کے بعد ٹینس کو خیر باد کہہ دیں گی اور ان کے شاندار کیریئر کا اختتام قریب تر ہوتا جا رہا ہے۔40 سالہ ولیمز شکست کے بعد میڈیا سے گفتگو کیے بغیر تیزی سے ٹینس کورٹ سے چلیں گئیں ۔