کراچی ( نمائندہ خصوصی ) صوبائی وزیر اطلاعات و ٹرانسپورٹ شرجیل انعام میمن اور وزیر بلدیات سید ناصر حسین شاہ کی متحدہ عرب امارات کے قونصل خانے آمد۔ صوبائی وزراء نے یو اے ای کے قونصل جنرل جناب بخیت عتیق الرومیتھی سے متحدہ عرب امارات کے صدر شیخ خلیفہ بن زید النہیان کے انتقال پر تعزیت کا اظہار کیا اور مرحوم کے درجات کی بلندی کے لئے دعا کی ۔
صوبائی وزراء نے سندھ حکومت اور صوبے کی عوام کی جانب سے اماراتی قونصل جنرل سے گہری ہمدردی اور دکھ کا اظہار کیا ۔ انہوں نے کہا کہ سندھ کے عوام کو شیخ خلیفہ بن زید النہیان کے انتقال پر گہرا صدمہ پہنچا ہے ۔ شیخ خلیفہ بن زید النہیان نے پاکستان کے عوام کا ہر مشکل گھڑی میں ساتھ دیا ۔ شرجیل انعام میمن اور سید ناصر حسین شاہ نے کہا کہ شیخ خلیفہ بن زید النہیان کی پاکستان کی عوام کےلئے خدمات ناقابل فراموش ہیں۔
