کوئٹہ ( خصوصی رپورٹ) بلوچستان میں بارشوں اور سیلاب نے تباہی مچادی، مزید 3 افراد جاں بحق، جاں بحق ہونے والوں کی مجموعی تعداد 107 ہوگئی، پی ڈی ایم اے نے بارشوں سے اب تک ہونے والے نقصانات کی رپورٹ جاری کردی۔
جاری کردہ رپورٹ میں بتایا گیا کہ بلوچستان میں بارشوں کے باعث مزید 3 افراد جاں بحق ہوگئے جس کے بعد جاں بحق ہونے والوں کی مجموعی تعداد 107 ہوگئی۔ جاں بحق ہونے والوں میں 42 مرد، 30 خواتین اور 34 بچے شامل ہیں جب کہ بولان، کوئٹہ، ژوب، دکی اور خضدار میں اموات ہوئیں۔
پی ڈی ایم اے کا کہنا ہے کہ بارشوں کے دوران حادثات میں 62 افراد زخمی ہوئے جب کہ صوبے بھر میں مجموعی طور پر 6077 مکانات گرنے اور نقصان پہنچا۔ پی ڈی ایم اے کی رپورٹ کے مطابق بارشوں سے 565 کلومیٹر پر محیط 4 مختلف شاہراہیں شدید متاثر ہوئیں جب کہ بارشوں کے باعث 712 مویشی بھی ہلاک ہوچکے ہیں۔
پی ڈی ایم نے کہا کہ کل 1 لاکھ 97 ہزار 930 ایکڑ کھڑی فصلوں، سولر پلیٹس، ٹیوب ویل اور بورنگ کو نقصان پہنچا ہے۔
