سنی علماء کونسل پاکستان کا اسرائیلی مصنوعات کے مکمل بائیکاٹ کا مطالبہ

اسلام آباد(نمائندہ خصوصی)سنی علماء کونسل پاکستان کے مرکزی صدر علامہ اورنگزیب فاروقی نے کہا ہے کہ غزہ میں نہتے مظلوم مسلمانوں پر اسرائیلی جارحیت کو فی الفور بند ،مسلمانوں کی جبری بے خلی کو روکا، امدادی اشیاء کی رسائی اور بحالی کے کاموں کا آغاز کیا جائے ۔انہوں نے اسرائیلی مصنوعات کے مکمل بائیکاٹ کا بھرپور مطالبہ کیا ان خیالات کا اظہار انہوں نے ڈی چوک میں اسرائیل مردہ باد مارچ سے خطاب کرتے ہوئے کیا۔سنی علماء کونسل اسلام آباد/راولپنڈی ڈویژن نے جمعرات کے روز آبپارہ چوک سے ڈی چوک اسرائیل مردہ باد مارچ کیا ۔ اس موقع پر جڑواں شہروں سے ہزاروں افرادنے شرکت کی ۔ مظاہرین سے خطاب کرتے ہوئے علامہ اورنگزیب فاروقی نے کہا کہ غزہ اس وقت تاریخ کے بدترین دور سے گزر رہا ہے ۔ 71 ہزار بے گناہ فلسطینیوں کو شہید کر دیا گیا ہے جن میں 70 فیصد خواتین اور بچے شامل ہیں۔ ایک لاکھ بیس ہزار زخمی ہیں جنہیں طبی سہولیات بھی مہیا نہیں کی جا رہیں۔ پانچ لاکھ سے زائد لوگ بھوک اور افلاس کا شکار ہیں انہوں نے مزید کہا کہ اسرائیل کی غزہ کے نہتے شہریوں پر مسلسل بمباری جاری ہے۔علامہ اورنگزیب فاروقی نے انسانی حقوق کے نام پر کام کرنے والی تنظیموں سے سوال کیا کہ غزہ میں اسرائیل کی جارحیت پر کیوں خاموش ہیں۔مارچ کے شرکاء سے قائد کے پی کے علامہ عطاء محمد دیشانی،جمعیت اہلحدیث کے امیر علامہ ابتسام الہٰی ظہیر،جمعیت اہلحدیث کے رہنما سید عتیق شاہ،عظیم مذہبی اسکالر مفتی مجیب الرحمن، قائد کشمیر مولانا تصدق حسین،مفتی تنویر عالم فاروقی،حافظ نصیر احمد، مولانا عبدالرحمن معاویہ،انجمن تاجران کے صدر اجمل بلوچ،صدر انجمن تاجران جی ٹین اخلاق عباسی،سی ڈی اے یونین کے سابق جنرل سیکرٹری امان اللہ خان،انجمن تاجران کراچی کمپنی کے رہنما راجہ ذوالفقار احمد،شاہد عباسی، سردار سعید اور دیگر نے بھی خطاب کیا ۔