پیپلزپارٹی گھر کی لڑائی میڈیا پر لڑنے کی کوشش نہ کرے:عظمیٰ بخاری

لاہور(نمائندہ خصوصی) وزیر اطلاعات پنجاب عظمیٰ بخاری نے کہا ہے کہ پیپلز پارٹی کو اپنی داخلی لڑائی میڈیا پر نہیں لڑنی چاہیے۔نہروں پر سیاست کرنا ہمیشہ سندھ کا وطیرہ رہا ہے، جبکہ حقیقت یہ ہے کہ پیپلز پارٹی کو پہلے یہ طے کرنا ہوگا کہ پانی کس کا ہے – سندھ کا یا پنجاب کا۔ انہوں نے کہا کہ پیپلز پارٹی کے رہنما کسانوں کے ساتھ کھڑے ہونے کا دعویٰ کرتے ہیں، لیکن پہلے انہیں یہ جانچ لینا چاہیے کہ آیا کسان بھی ان کے ساتھ کھڑے ہیں یا نہیں۔ان خیالات کا اظہار انہوں نے چوہدری منظور کی پریس کانفرنس پر ردعمل دیتے ہوئے کیا۔ انہوں نے کہا کہ آپ پنجاب میں رہ کر پنجاب کی لڑائی نہیں لڑ سکتے؟وزیر اطلاعات نے واضح کیا کہ پنجاب نہ کسی کا حق چھینتا ہے اور نہ کسی کو اپنا حق کھانے دیتا ہے۔ انہوں نے کہا کہ پنجاب نے ہمیشہ بڑے بھائی کا کردار ادا کیا ہے اور اس کی تاریخ گواہ ہے کہ اس نے کبھی کسی کے ساتھ ناانصافی نہیں کی۔ عظمیٰ بخاری نے مشورہ دیا کہ وزیراعلیٰ پنجاب سے سوال کرنے کی بجائے بہتر ہوگا کہ پیپلز پارٹی صدر پاکستان سے اس معاملے پر وضاحت طلب کرے۔