کوہستان: عید پر گھر جانے والے کسٹم اہلکار حادثے کا شکار، دو ہزار ضبط شدہ موبائل فونز برآمد

کوہستان (نمائندہ خصوصی)کسٹم سوست پورٹ سے عید منانے گھر جانے والے کسٹم اپریزر نظام اور یوڈی سی ابوبکر کی گاڑی بشام کے قریب حادثے کا شکار ہوگئی، جس کے نتیجے میں دونوں اہلکار شدید زخمی ہوگئے۔ ذرائع کے مطابق، دونوں زخمیوں کی حالت تشویشناک بتائی جا رہی ہے اور انہیں فوری طور پر قریبی اسپتال منتقل کر دیا گیا۔حادثے کے دوران گاڑی سے تقریباً دو ہزار قیمتی موبائل فون بھی برآمد ہوئے، جو مبینہ طور پر سوست کسٹم میں ضبط شدہ تھے۔ واقعے کی اطلاع ملتے ہی مقامی انتظامیہ اور متعلقہ حکام موقع پر پہنچ گئے اور تحقیقات کا آغاز کر دیا گیا ہے۔مزید تفصیلات تاحال سامنے نہیں آ سکیں، تاہم حکام کا کہنا ہے کہ واقعے کی مکمل چھان بین کی جائے گی تاکہ حادثے کی اصل وجوہات اور موبائل فونز کی موجودگی کے بارے میں حقائق سامنے آ سکیں۔