چیف آف دی نیول اسٹاف کا کوسٹل اور کریکس کے علاقوں میں پاک بحریہ کے اگلے مورچوں کا دورہ

کراچی( نمائندہ خصوصی)چیف آف دی نیول اسٹاف ایڈمرل نوید اشرف نے کوسٹل اور کریکس کے علاقوں میں پاک بحریہ کے اگلے مورچوں اور پاک بحریہ کے جنگی جہازوں کا دورہ کیا اور وہاں تعینات افسران اور جوانوں سے ملاقات کی ۔دورے کے دوران، ایڈمرل نوید اشرف نے کوسٹل اور کریکس کے علاقوں اور پاک بحریہ کے جہازوں پر تعینات اہلکاروں کو عیدالفطر کی مبارکباد دی اور اپنےفرض کے لیے ان کی غیر متزلزل لگن کو سراہا۔ انہوں نے اس بات پر زور دیا کہ قومی مفادات کا تحفظ ہماری اولین ترجیح ہے اور ہم کسی بھی قربانی سے دریغ نہیں کریں گے۔ نیول چیف نے ملکی دفاع میں پاک بحریہ کے اہلکاروں کے کردار اور ان کی آپریشنل تیاری کو بھی سراہا۔ملکی میری ٹائم حدود کے دفاع کے لیے پاک بحریہ کے عزم کا اعادہ کرتے ہوئے چیف آف دی نیول اسٹاف نے خطے کے استحکام میں بھی پاک بحریہ کے کردار کو اجاگر کیا۔ ایڈمرل نوید اشرف نے ملکی دفاع میں ان کے اہم کردار کو خراج تحسین پیش کرتے ہوئے جوانوں کو تاکید کی کہ وہ اسی جذبے اور فرض شناسی کے ساتھ اپنے مشن کو جاری رکھیں۔اگلے مورچوں پر تعینات افسران اور جوانوں سے خطاب کرتے ہوئے نیول چیف نے انتہائی دشوار حالات میں اس اہم سرحد کے دفاع کا فریضہ انجام دینے میں ان کی غیر متزلزل لگن اور بلند حوصلے کو سراہا۔ نیول چیف نے کریکس ایریا میں پاک میرینز کی آپریشنل تیاریوں پر مکمل اطمینان کا اظہار کیا۔