سفارتخانہ پاکستان پیرس میں یوم پاکستان کی مناسبت سےپرچم کشائی کی پروقار تقریب

پیرس۔(نمائندہ خصوصی):سفارتخانہ پاکستان پیرس میں یوم پاکستان کی مناسبت سے پرچم کشائی کی پروقار تقریب کا انعقاد کیا گیا۔ اتوار کو فرانس میں پاکستانی سفارت خانے کی جانب سے جاری بیان کے مطابق تقریب میں پاکستانی تارکین وطن، میڈیا کے نمائندوں اور سفارتخانے کے عہدیداروں کی ایک بڑی تعداد نے شرکت کی۔ اس موقع پر صدر مملکت، وزیراعظم اور وزیر خارجہ کے خصوصی پیغامات پڑھ کر سنائے گئے۔سفیر ممتاز زہرا بلوچ نے مہمانوں کا استقبال کیا اور یوم پاکستان کو یکجہتی سے منانے پر ان کا شکریہ ادا کیا۔ انہوں نے پاکستان کی تاریخ میں 23 مارچ کی اہمیت کو اجاگر کیا اور تحریک آزادی کے قائدین کو زبردست خراج تحسین پیش کیا۔پاکستان فرانس تعلقات کی اہمیت کو اجاگر کرتے ہوئے سفیر نے سیاسی، اقتصادی، سائنسی، تعلیمی اور ثقافتی شعبوں میں دوطرفہ تعلقات کو وسعت دینے کے عزم کا اعادہ کیا۔ سفیر نے فرانس میں پاکستانی کمیونٹی کے کردار کو سراہا اور ان پر زور دیا کہ وہ فرانس میں پاکستانی شہریوں کی فلاح و بہبود کے لیے کام کرتے ہوئے مقامی قوانین اور ثقافت کا احترام کری انہوں نے پاکستانی تارکین وطن کے درمیان اتحاد کی اہمیت پر زور دیا اور کہا کہ وہ دونوں ممالک کے درمیان ثقافتی اور عوام کے درمیان رابطوں کو فروغ دیں۔انہوں نے فرانس میں مقیم پاکستانی کمیونٹی کو سہولت فراہم کرنے میں پاکستان کے سفارتخانے پیرس کے مکمل تعاون کا بھی یقین دلایا۔