کراچی(نمائندہ خصوصی)پاکستان ایئرپورٹس اتھارٹی (PAA) اور پاکستان انٹرنیشنل ایئرلائنز کارپوریشن لمیٹڈ (PIACL) کے افسران پر مشتمل مشترکہ بورڈ آف آفیسرز (BOO) نے پاراچنار ایئرپورٹ کا دورہ کیا تاکہ تجارتی اور انسانی پروازوں کی بحالی کے امکانات کا جائزہ لیا جا سکے۔یہ دورہ وزارت دفاع کی ہدایات کے تحت کیا گیا۔ آٹھ رکنی کمیٹی میں چھ افسران PAA سے اور دو 
PIACL سے شامل ہیں۔ ٹیم کی قیادت یونس لقمان قاضی، ایڈیشنل ڈائریکٹر آپریشنز (IIAP) نے کی، جبکہ دیگر ارکان میں محسن احمد غوری، ڈپٹی اے پی ایم (BKIAP) اور انجینئر شاہ جہاں، سینئر جے ٹی او سی این ایس (BKIAP) شامل تھے۔دورے کے دوران، کمیٹی نے ایئرپورٹ کے بنیادی ڈھانچے کا تفصیلی معائنہ کیا، جس میں ٹرمینل بلڈنگ، رن وے، فائر گیراجز، PAA کی رہائش گاہ، 
جنریٹر روم، اور دیگر آپریشنل سہولیات شامل تھیں۔معائنے کے بعد، BOO کے ارکان نے ڈپٹی کمشنر (DC) پاراچنار سے ان کے دفتر میں ملاقات کی اور پاراچنار ایئرپورٹ پر آپریشنز کی بحالی کے حوالے سے تبادلہ خیال کیا۔معائنے کے نتائج پر مبنی فزیبیلٹی رپورٹ مرتب کی جا رہی ہے، جس کی بنیاد پر ایئرپورٹ کی تجارتی اور انسانی پروازوں کے لیے بحالی سے متعلق فیصلے کیے جائیں گے۔
