لاہور پولیس کا برق رفتار ایکشن، 10سالہ بچہ24گھنٹے میں باحفاظت بازیاب

لاہور( نمائندہ خصوصی) لاہور پولیس نے کارروائی کرتے ہوئے گجرپورہ کے علاقے سے اغواء ہونے والے 10سالہ بچے زمان کو 24گھنٹے میں باحفاظت بازیاب کروالیا۔ سی سی پی او لاہورنے ڈی ایس پی گجر پورہ سہیل حسین کاظمی اور ایس ایچ اورمحمد ذکاکو شاباش دی اور تعریفی سرٹیفکیٹس سے نوازا۔ بلال صدیق کمیانہ نے پولیس ٹیم کی کارکردگی کو سراہا اورمزید محنت و لگن سے کام کرنے کی تلقین کی۔ ایس پی سول لائنز (آپریشنز)عبدالحنان کی سربراہی میں پولیس ٹیم نے 6فروری کو گجر پورہ کے رہائشی ابو سفیان کے اغواء ہونے والے 10 سالہ بیٹے زمان کوفوری کارروائی کرتے ہوئے 24گھنٹے میں بازیاب کروایا تھا۔ پولیس ٹیم نے اغواء کاروں عدیل، ابراراور بابرکو چوہنگ سے کارروائی کے نتیجے میں گرفتار کیا۔ کارروائی کے دوران اغواء کاروں سے تاوان کے80لاکھ روپے اور غیر قانونی اسلحہ بھی برآمدکیا گیا۔ پولیس ٹیم نے ہیومن انٹیلی جنس اورجدید ٹیکنالوجی کی مدد سے کامیاب آپریشن کر کے بچے کو بازیاب کروایا۔سی سی پی او لاہور نے کہا کہ پولیس ٹیم نے جس تیز رفتاری کا مظاہرہ کرتے ہوئے بچے کو بازیاب کروایا وہ لائق تحسین ہے۔انہوں نے کہا کہ بچے کی فوری اور باحفاظت بازیابی لاہور پولیس کی پیشہ ورانہ مہارت کا منہ بولتا ثبوت ہے۔بلال صدیق کمیانہ نے کہا کہ قابل اور محنتی پولیس ملازمین محکمے کا قیمتی سرمایہ ہیں۔انہوں نے کہا کہ لاہور پولیس جرائم کے خاتمے کے لئے مسلسل سرگرم عمل ہے۔