پاکستان رینجرزاور پولیس کی مشترکہ کارروائی :انتہائی مطلوب ملزم حماد عرف حمو کو گرفتار

 کراچی ( نمائندہ خصوصی)پاکستان رینجرز (سندھ)اور پولیس نے انٹیلی جنس معلومات کی بنیاد پر مشترکہ کارروائی کرتے ہوئے کراچی کے علاقے لیاری    سے گینگ وار کمانڈر زاہد لاڈلہ اور شکیل بادشاہ گروپ سے تعلق رکھنے والا انتہائی مطلوب ملزم حماد عرف حمو کو گرفتار کر لیا۔ملزم کے قبضے سے اسلحہ و ایمونیشن برآمد کر لیا گیا۔ تفصیلات کے مطابق ملزم شاہ بیگ لین لیاری کارہائشی ہے۔ ملزم 2024میں عزیر بلوچ کی ذہن سازی کرنے پر کالعدم تنظیم لیاری گینگ وار زاہد لاڈلہ گروپ میں شامل ہوا۔

ابتدائی تفتیش کے دوران ملزم نے انکشاف کیا ہے کہ نیاآباد لیاری میں واقعہ نجی  ا ٓئل ڈپو کے مالک کو بذریعہ واٹس ایپ لیاری گینگ وار کمانڈر شکیل بادشاہ خان نے مبلغ پانچ لاکھ روپے بھتہ کی ڈیمانڈ کی اور بھتہ نہ دینے کی صورت میں جان سے مارنے کی دھمکیاں دیں۔ بھتہ نہ ملنے پر ملزم نے اپنے دیگر ساتھیوں عزیر بلوچ اور منور عرف منو نے نجی آئل ڈپو پر فائرنگ کی جس میں ملزم موٹر سائیکل چلارہاتھا،جس کی ایف آئی آر ملزمان کے خلاف تھانہ کلری میں درج ہے۔واضع رہے شکیل بادشاہ اور زاہد لاڈلہ کا آپس میں قریبی گٹھ جوڑ ہے۔ ملزم کے دیگر ساتھیوں کی گرفتار کے لیئے چھاپے مارے جارہے ہیں۔   گرفتارملزم کو اسلحہ ایمونیشن سمیت مزید قانونی کاروائی کے لیے پولیس کے حوالے کر دیا گیا ہے۔ عوام سے اپیل ہے کہ ایسے عناصر کے بارے میں اطلاع فوری طور پر قریبی رینجرز چیک پوسٹ، رینجرز ہیلپ لائن 1101 یا رینجرز مددگار واٹس ایپ نمبر 03479001111 پر کال یا ایس ایم ایس کے ذریعے دیں۔ آپ کا نام صیغہ راز میں رکھا جائے گا۔