اسلام آباد۔(نمائندہ خصوصی):صدر اسلامی جمہوریہ پاکستان آصف علی زرداری نے پوری پاکستانی قوم اور امت مسلمہ کو رمضان المبارک کے بابرکت مہینے کے آغاز کی مبارکباد دیتے ہوئے کہا ہے کہ رمضان المبارک ہمیں ضرورت مندوں اور محروم طبقات کی تکالیف کا احساس دلاتا ہے، ماہ مبارک کا پیغام یہی ہے کہ ہم اپنی ذات سے بلند ہو کر دوسروں کی مدد کریں، غربا و مساکین کی حاجت روائی کریں اور معاشرے میں ایثار و قربانی کے جذبے کو فروغ دیں، قوم سے اپیل ہے کہ اس مبارک مہینے میں خیرات و صدقات میں بڑھ چڑھ کر حصہ لیں اور ضرورت مند افراد کا خاص خیال رکھیں، ہمیں اپنی استطاعت سے بڑھ کر غریبوں کا سہارا بننے کی ضرورت ہے۔ایوان صدر کے پریس ونگ سے جاری بیان کے مطابق یہ بات صدر مملکت آصف علی زرداری نے رمضان المبارک1446ھ کے آغاز پر قوم کے نام اپنے پیغام میں کہی۔ صدر مملکت آصف علی زرداری نے کہا کہ میں پوری پاکستانی قوم اور امت مسلمہ کو رمضان المبارک کے بابرکت مہینے کے آغاز پر مبارکباد دیتا ہوں۔ انہوں نے کہا کہ رمضان المبارک رحمت، مغفرت اور جہنم سے نجات کا مہینہ ہے۔ یہ مہینہ ہمیں تزکیہ نفس، صبر، استقامت، ہمدردی، مساوات اور اتحاد و یگانگت کا درس دیتا ہے، رمضان المبارک تقوی، اخلاص اور قربِ الہی حاصل کرنے کا بہترین موقع ہے۔صدر مملکت نے کہا کہ یہ مہینہ مسلمانوں کے لیے انفرادی اور اجتماعی سطح پر اصلاح کا ماحول پیدا کر کے اپنی زندگیوں کو از سر نو شروع کرنے کا بہترین موقع فراہم کرتا ہے۔آصف علی زرداری نے کہا کہ رمضان المبارک ہمیں ضرورت مندوں اور محروم طبقات کی تکالیف کا احساس بھی دلاتا ہے ۔ رمضان المبارک کا پیغام یہی ہے کہ ہم اپنی ذات سے بلند ہو کر دوسروں کی مدد کریں، غربا و مساکین کی حاجت روائی کریں اور معاشرے میں ایثار و قربانی کے جذبے کو فروغ دیں۔صدر مملکت نے کہا کہ میں پاکستانی قوم سے اپیل کرتا ہوں کہ اس مبارک مہینے میں خیرات و صدقات میں بڑھ چڑھ کر حصہ لیں اور ضرورت مند افراد کا خاص خیال رکھیں، ہمیں اپنی استطاعت سے بڑھ کر غریبوں کا سہارا بننے کی ضرورت ہے۔ صدر مملکت نے کہا کہ یہی وہ اصول ہیں جو ایک مضبوط، ترقی یافتہ اور ہمدردی کی بنیاد پر مبنی معاشرے کی تشکیل میں اہم کردار ادا کرتے ہیں، اس کے ذریعے ہم رمضان کے مقاصد اور اس کے ثواب کے حصول میں کامیاب ہوں گے۔صدر مملکت نے دعا کی کہ اللہ تعالی ہمیں رمضان المبارک کی برکتوں سے مستفید ہونے، صبر و تقوی اختیار کرنے اور امتِ مسلمہ کی فلاح و بہبود کے لیے اپنا کردار ادا کرنے کی توفیق عطا فرمائے۔ میں اللہ تعالی کے حضور دعا گو ہوں کہ یہ مہینہ ملک پاکستان کیلئے امن و استحکام ، ترقی اور خوشحالی کا پیغام لیکر آئے۔ اللہ تعالی ہم سب کا حامی و ناصر ہو! آمین۔