ماحولیاتی تبدیلی کے خلاف مؤثر پالیسی سازی کے لئے عالمی معیار کو اپنانا ضروری ہے،رومینہ خورشید عالم

اسلام آباد۔(نمائندہ خصوصی):وزیر اعظم کی کوآرڈینیٹر برائے ماحولیاتی تبدیلی رومینہ خورشید عالم نے کہا ہے کہ ماحولیاتی تبدیلی کے خلاف مؤثر پالیسی سازی کے لئے عالمی معیار کو اپنانا ضروری ہے،پاکستان میں موسمیاتی مزاحمت کے فروغ کے لئے فیز تھری جیسی کوششیں قابل تعریف ہیں، پاکستان ریڈ کریسنٹ سوسائٹی اور جرمن ریڈ کراس کی شراکت سے ماحولیاتی تبدیلی کے حوالے سے کام سے جاری ہے۔ان خیالات کا اظہار انہوں نے بدھ کو یہاں کلائمیٹ ایڈووکیسی کے حوالے سے ہلال احمر کی فیز تھری لانچنگ تقریب سے خطاب کرتے ہوئے کیا۔ انہوں نے کہا کہ 2022 کے سیلاب اور شدید گرمی کی لہر جیسے خطرات کے پیش نظر فوری اقدامات کی ضرورت ہے۔ رومینہ خورشید عالم نے کمیونٹی کی سطح پر ماحولیاتی مزاحمت بڑھانے کے عزم کا اعادہ کرتے ہوئے کہا کہ کلائمیٹ ایڈووکیسی فیز تھری کے تحت کمیونٹی پر مبنی اور سائنسی بنیادوں پر مسائل کے حل کرنے کی ضرورت ہے۔انہوں نے کہا کہ جرمن ریڈ کراس کی معاونت سے مقامی سطح پر ماحولیاتی استعداد بڑھانے کا منصوبہ ہے، ماحولیاتی تبدیلی کے خلاف مؤثر پالیسی سازی کے لئے عالمی معیار کو اپنانا ضروری ہے۔ رومینہ خورشید عالم نے ماحولیاتی خطرات سے نمٹنے کے لئے اجتماعی کوششوں پر زور دیا اور موسمیاتی تبدیلی کے حل کے لئے سرکاری و نجی شراکت داری کو مستحکم کرنے کا اعلان کیا۔