سیف سٹی کی مدد سے خواتین کو اغوا کرنے والا گروہ گرفتار، مغوی خاتون بحفاظت بازیاب۔

لاہور( نمائندہ خصوصی) پنجاب سیف سٹیز اتھارٹی اور پولیس کی مشترکہ کارروائی کے نتیجے میں خواتین کو اغوا کرنے والا ایک منظم گروہ بے نقاب ہوگیا، جبکہ مغوی خاتون کو بحفاظت بازیاب کروا لیا گیا۔ تفصیلات کے مطابق لاہور کے علاقے شاہدرہ کی رہائشی خاتون، جو مبینہ طور پر سسرال کے تشدد سے دلبرداشتہ ہو کر گھر چھوڑ آئی تھی جرائم پیشہ افراد کے ہتھے چڑھ گئی۔ ملزمان نے اسے تحفظ دینے کا جھانسہ دے کر اغوا کیا اور فروخت کرنے کی نیت سے جہلم لے گئے۔ تاہم، خاتون نے ہمت کا مظاہرہ کرتے ہوئے موقع ملتے ہی 15 ایمرجنسی ہیلپ لائن پر کال کرکے مدد طلب کی۔ ورچوئل ویمن پولیس اسٹیشن نے فوری کارروائی کرتے ہوئے جہلم پولیس کو الرٹ کیا اور مسلسل کیس کی پیروی جاری رکھی، خاتون کا نمبر بار بار بند جا رہا تھا۔ سیف سٹی کے نمبر ٹریسنگ کی مدد سے خاتون کی لوکیشن ٹریس کی، جس کے بعد جہلم پولیس کو فوری طور پر موقع پر بھیجا گیا۔ تحقیقات میں انکشاف ہوا کہ یہ ایک منظم گروہ ہے، جو معصوم خواتین کو ورغلا کر اغوا کرتا اور انہیں فروخت کرنے کی کوشش کرتا تھا۔ تاہم، ورچوئل ویمن پولیس اسٹیشن اور جہلم پولیس کی بروقت کارروائی سے نہ صرف مغوی خاتون بلکہ دیگر کئی متاثرہ خواتین کو بھی بحفاظت بازیاب کروا لیا گیا، جبکہ ملزمان کو گرفتار کرلیا گیا۔ترجمان سیف سٹیز کے مطابق ظلم و زیادتی کا شکار خواتین کسی بھی ہنگامی صورتحال میں فوری مدد کے لیے 15 پر کال کرکے 2 دبائیں اور ورچوئل ویمن پولیس اسٹیشن سے رابطہ کریں۔