”گھر بنائیں گے بھی، گھر بسائیں گے بھی“ بیٹیوں کیلئے وزیراعلی پنجاب مریم نوازشریف کا پیار ”پنجاب دھی رانی پروگرام“ کے تحت 1500اجتماعی شادیوں کا پہلا مرحلہ مکمل، دوسرا مرحلہ شروع، مزید 1500شادیوں کیلئے درخواستوں کی وصولی کاآغاز

لاہور( نمائندہ خصوصی) وزیراعلی پنجاب مریم نوازشریف کا ”گھر بنائیں گے بھی، گھر بسائیں گے بھی“ ویژ ن مقبول عام حیثیت حاصل کرچکا ہے-وزیراعلی مریم نوازشریف کے فلیگ شپ منصوبے”پنجاب دھی رانی پروگرام“ کے تحت 1500اجتماعی شادیوں کاپہلا مرحلہ مکمل ہوگیااوروزیراعلی مریم نوازشریف کی ہدایت پر ”پنجاب دھی رانی پروگرام“کا دوسرا مرحلہ شروع کردیاہے جس کے تحت مزید 1500شادیوں کے لئے درخواستوں کی وصولی کاآغاز کردیا گیا-”پنجاب دھی رانی پروگرام“ کے لئے درخواستیں آن لائن پورٹل cmp.punjab.gov.pkپر گھر بیٹھے جمع کرائی جا سکتی ہیں -”پنجاب دھی رانی پروگرام“ کے لئے درخواستیں ڈپٹی ڈائریکٹر سوشل ویلفیئر کے ضلعی آفس میں بھی جمع کرائی جا سکتی ہیں – ”پنجاب دھی رانی پروگرام“ کے بارے میں معلومات کے لئے 1312ہیلپ لائن بھی قائم کر دی گئی ہے-اجتماعی شادیوں کی تقریب میں دولہا دلہن او رانکے قریبی عزیز واقارب کے لئے کھانا حکومت پنجاب کی طرف سے دیا جائے گا -اجتماعی شادیوں میں نئے شادی شدہ جوڑوں کو اے ٹی ایم کے ذریعے ایک لاکھ روپے سلامی بھی دی جائے گی -”دھی رانی پروگرام“ کے تحت دولہا دلہن کو فرنیچر اور کپڑوں سمیت دیگر ضروری سازو سامان کے تحائف بھی پیش کئے جائیں گے -وزیراعلی مریم نوازشریف نے کہاکہ پنجاب کی ہر بیٹی سے محبت ہے، گھر بسانے پر دلی خوشی ہوتی ہے-معاشرے کے نادار اور محروم معیشت طبقات کا احساس حکومت کی ذمہ داری ہے جسے اچھی طرح نبھائیں گے-بیٹیوں کے سر پر دست شفقت رکھنا پنجاب کی ریت ہے-