وزیر خزانہ سینیٹر محمد اورنگزیب کی لزبن میں برطانیہ کے پارلیمانی انڈر سیکرٹری آف سٹیٹ برائے مشرق وسطٰی، پاکستان اور افغانستان ہمیش فاکنر سے ملاقات

اسلام آباد۔(نمائندہ خصوصی):وزیر خزانہ سینیٹر محمد اورنگزیب نے لزبن پرتگال میں برطانیہ کے پارلیمانی انڈر سیکرٹری آف سٹیٹ برائے مشرق وسطٰی، پاکستان اور افغانستان ہمیش فاکنر سے ملاقات کی ہے۔ وزارت خزانہ کی جانب سے اتوار کو یہاں جاری اعلامیہ کے مطابق ملاقات کے دوران سینیٹر محمد اورنگزیب نے پاکستان اور برطانیہ کے مابین باہمی اعتماد اور شراکت داری پر مبنی قریبی اور گرم جوشانہ تعلقات کا اعادہ کیا اور دونوں ممالک کے درمیان تعلقات کو مزید مستحکم اور پائیدار بنانے کی خواہش کا اظہار بھی کیا۔ملاقات کے دوران باہمی دلچسپی کے امور بالخصوص پاکستان میں توانائی، معدنیات اور انفراسٹرکچر کے شعبوں میں سرمایہ کاری کے مواقع پر بھی تبادلہ خیال کیا گیا۔ اس موقع پر باہمی تعلقات کے فروغ میں عوامی رابطوں اور پاکستانی تارکین وطن کے کردار کو بھی سراہا گیا۔