لاہور۔(نمائندہ خصوصی)وزیراعظم محمد شہباز شریف اور وزیر اعلی پنجاب مریم نواز نے نیشنل ہارس اینڈ کیٹل شو کا افتتاح کردیا۔ وزیراعلی نے نیشنل ہارس اینڈ کیٹل شوکی افتتاحی تقریب میں فورٹریس سٹیڈیم آمد پروزیراعظم محمد شہباز شریف کا خیر مقدم کیا۔وزیراعظم محمد شہبازشریف اور وزیراعلی پنجاب روایتی بگھی پر سوارہوکر سلامی کے چبوترے پر پہنچے،چارگھڑ سواروں کے دستے نے چبوترے کے سامنے آکر ہارس اینڈ کیٹل شو کے آغاز کی اجازت طلب کی۔مہمانان خصوصی نے رسمی اجازت 
دے کر ہارس اینڈ کیٹل شوکاباقاعدہ افتتاح کر دیا۔وزیراعلی مریم نواز نے ہینڈ پرنٹ سے میلے کا منفرد ڈیجیٹل افتتاح بھی کیا۔ ہارس اینڈ کیٹل شو کا آغاز ہوتے ہی فورٹریس سٹیڈیم ڈھول کی تھاپ سے گونج اٹھا، پاکستان، کویت، ناروے،عمان، قطر، سعودی عرب، سائوتھ افریقہ، امریکہ کی انٹرنیشنل ٹینٹ پیگنگ ٹیموں کے دستوں نے مارچ پاسٹ کیا۔پاکستان، ایران، ترکیہ، تاجکستان کی آرچری ٹیموں کے دستے نے بھی مارچ کیا،ڈھول کی تھاپ پر ناچتے اونٹوں سے لائیو سٹاک مارچ کا آغاز ہوا، شو میں نیلی راوی ساہیوال اور دیگر پنجاب کی بہترین نسل کی بھینسوں کی نمائش کی گئی، لوہی، مندری بھیڑ،تھل فیصل آباد اور گجرات بیتل اور ناچی بکریاں بھی توجہ کامرکز رہی، علاقائی اور صوبائی ثقافت کی عکاسی کرتے رنگ برنگے فلوٹ حاضرین کی
دلچسپی کا مرکزبنے رہے، سجے سجائے فلوٹس پر روایتی علاقائی رقص کے مظاہرے پیش کئے گئے۔افتتاحی تقریب میں سینکڑوں ڈھولچیوں کے دستے نے اپنے فن کا مظاہرہ کیا،بیک وقت 6 ڈھول بجاتا ڈھولچی سب کی توجہ کا مرکز بن گیا۔ ہارس اینڈ کیٹل شو میں درویش رقص کا سحر انگیز شو پیش کیا گیا۔ سلواکیہ کے ماہر فنکاروں نے لیزر لائٹس کرتب سے شائقین کو محظوظ کیا،مقدونیہ کے بینڈ نے ہارس اینڈ کیٹل شو میں اپنے فن کا مظاہرہ کیا۔ معروف کوریوگرافر وہاب شاہ نے سینکڑوں فنکاروں کے ہمراہ پنجاب کے روایتی گیت پیش کر کے سماں باندھ دیا۔ عاطف اسلم کی خصوصی پرفارمنس پر ہزاروں بچے اور نوجوان سٹیج کے سامنے جمع ہو گئے ۔تقریب میں ڈرون سے قومی پرچم، مینار پاکستان اور دیگر قومی و علاقائی لیزر امیج بھی پیش کئے گئے۔
ہارس اینڈ کیٹل شو میں مشعلیں بھی روشن کی گئیں ۔ ہارس اینڈ کیٹل شو میں کثیر تعداد میں فیملیزنے شرکت کی۔ وزیراعلی پنجاب نے حاضرین کے پاس جا کر ملاقات کی، حاضرین نے پرجوش نعروں سے وزیر اعلی مریم نواز کا خیر مقدم کیا۔ افتتاحی تقریب میں غیر ملکی مہمانوں ، وفاقی وزیر داخلہ محسن نقوی سمیت شہریوں کی بڑی تعداد موجود تھی۔
