بیجنگ/اسلام آباد۔(نمائندہ خصوصی):صدر مملکت آصف علی زرداری نے عوامی جمہوریہ چین کی ریاستی کونسل کے وزیر اعظم لی کیانگ سے جمعرات کو یہاں عظیم عوامی ہال میں ملاقات کی جس میں دوطرفہ تعلقات کو مزید مضبوط بنانے کے لئے پاکستان کے عزم کا اعادہ کرتے ہوئے دونوں ممالک کے درمیان وقت کی ہر آزمائش میں پورا اترنے والی گہری اور پائیدار شراکت داری پر زور دیاگیا ۔ایوانِ صدر کے پریس ونگ سے جاری بیان کے مطابق ملاقات کے موقع پر صدر مملکت نے پائیدار اور گہری چین 
پاکستان ہمہ موسمی سٹریٹجک کوآپریٹو پارٹنرشپ کا ذکر کیا جسے دونوں ممالک کے رہنمائوں نے نسل در نسل آگے بڑھایا اور مضبوط کیا ہے۔ انہوں نے دوطرفہ تعلقات کو مزید مضبوط بنانے کے لئے پاکستان کے عزم کا اعادہ کرتے ہوئے دونوں ممالک کے درمیان وقت کی ہر آزمائش میں پورا اترنے والی گہری اور پائیدار شراکت داری پر زور دیا۔صدر مملکت نے علاقائی روابط اور اقتصادی ترقی کو فروغ دینے میں چین پاکستان اقتصادی راہداری (سی پیک) کے اہم کردار پر روشنی ڈالی اور پاکستان کے ترقیاتی ایجنڈے کے لئے چین کی مسلسل حمایت کو سراہا۔ فریقین نے مشترکہ پیشرفت اور مشترکہ خوشحالی کو مزید آگے بڑھانے کے لئے قابل تجدید توانائی، سائنس و ٹیکنالوجی، انفراسٹرکچر اور زراعت کے شعبوں میں تعاون کو گہرا کرنے پر توجہ مرکوز کرتے ہوئے سی پیک کے دوسرے مرحلے کے تحت اعلیٰ معیار کی ترقی پر تبادلہ خیال کیا۔ انہوں نے بزنس ٹو بزنس اور نجی شعبے کے روابط کے ذریعے تجارتی اور اقتصادی تعاون کو بڑھانے کے مواقع پر بھی تبادلہ خیال کیا۔فریقین نے نئے دور میں مشترکہ مستقبل کی چین پاکستان کمیونٹی کی تعمیر کے لیے عوام سے عوام اور ثقافتی تبادلوں کو وسعت دینے کی اہمیت پر زور دیا
صدر آصف علی زرداری کی چین کے وزیر اعظم لی کیانگ سے ملاقات، دوطرفہ تعلقات کو مزید مضبوط بنانے کے عزم کا اعادہ
