وزیراعظم سے شاہ غلام قادر کی قیادت میں مسلم لیگ ن آزاد کشمیر کے وفد کی ملاقات،کشمیریوں کے غیر متزلزل حمایت پر خراج تحسین پیش کیا

اسلام آباد۔(نمائندہ خصوصی):وزیراعظم محمد شہباز شریف سے شاہ غلام قادر کی قیادت میں مسلم لیگ (ن)آزاد کشمیر کے وفد نے ملاقات کی ،وزیراعظم نے وفد کو کشمیری عوام کی فلاح وبہبود کے لیے اقدامات میں حکومت پاکستان کی جانب سے بھر پور تعاون کا یقین دلایا ۔پی ایم آفس کے پریس ونگ کے اعلامیہ کے مطابق وزیراعظم نے وفد کے ارکان کو کشمیری عوام کے مسائل کے حل کے لیے متحرک کرداد ادا کرنے کی تلقین اور آزاد کشمیر کے نوجوانوں کی ترقی کے لیے خصوصی اقدامات کی بھی ہدایت کی۔وفد نے حکومت پاکستان کی جانب سے آزاد جموں و کشمیر کی عوام کی فلاح و بہبود کے اقدامات پر وزیراعظم کو خراج تحسین پیش کیا ۔ملاقات میں وزیراعظم آزاد جموں و کشمیر چوہدری انوار الحق، سپیکر چوہدری لطیف اکبر اور وفاقی وزرا احسن اقبال، انجینئر امیر مقام، رانا تنویر حسین اور عطا اللہ تارڑ بھی شریک تھے