وزیرِ اعظم شہباز شریف کا سی ایم ایچ کوئٹہ کا دورہ ، بلوچستان میں دہشتگردوں سے لڑتے ہوئے زخمی ہونے والے سکیورٹی اہلکاروں کی عیادت کی

کوئٹہ۔(نمائندہ خصوصی)وزیرِ اعظم محمد شہباز شریف نے سی ایم ایچ کوئٹہ کا دورہ کیا اور قلات و بلوچستان کے دیگر اضلاع میں دہشتگردوں سے بہادری سے لڑتے ہوئے زخمی ہونے والے سکیورٹی فورسز کے اہلکاروں کی عیادت کی۔ پیر کو وزیراعظم آفس کے میڈیا ونگ سے جاری بیان کے مطابق وزیرِ اعظم نے جوانوں کی بہادری اور ہمت پر انہیں خراج تحسین پیش کیا اور زخمی جوانوں سے بات چیت کرتےہوئے ملک کی خاطر قربانی کے جذبے اور وطن کی حفاظت کے ان کےغیر متزلزل عزم کو سراہا۔نائب وزیرِ اعظم و وزیرِ خارجہ اسحاق ڈار، وزیرِ دفاع خواجہ محمد آصف، وفاقی وزیرِ اطلاعات و نشریات عطاء اللہ تارڑ اور وفاقی وزیرِ بجلی اویس لغاری بھی وزیرِ اعظم کے ہمراہ تھے۔ اس موقع پر وزیراعظم نے کہاکہ آپ سب قوم کے ہیرو ہیں، مجھ سمیت پوری قوم کو آپ اور قربانی کے جذبے سے سرشار آپ کے اہل خانہ پر فخر ہے۔ جب تک قوم کا تحفظ ایسے بہادر جوانوں کے سپرد ہے، دشمن پاکستان کی طرف میلی آنکھ سے نہیں دیکھ سکتا۔ وزیرِاعظم نے کہا کہ دہشتگردی کے ناسور کے ملک سے مکمل خاتمے کیلئے افواج پاکستان اور پاکستانی عوام شانہ بشانہ کھڑے ہیں۔بلوچستان میں دہشت و شر کی فضا پھیلانے والے عناصر بلوچستان کی ترقی کے دشمن ہیں۔ بلوچستان کے عوام کے تحفظ کے لئے سکیورٹی فورسز شر پسند عناصر کے سد باب کے لئے دن رات مصروف ہیں۔ وزیرِ اعظم نے کہاکہ بلوچستان کے امن، ترقی اور خوشحالی کے دشمنوں کے ناپاک عزائم کبھی کامیاب نہیں ہونے دیں گے۔