وفاق المدارس العربیہ پاکستان کے تحت سالانہ امتحانات کا آغاز

کراچی (نمائندہ خصوصی) پاکستان میں مدارس دینیہ کے سب سے بڑے بورڈ وفاق المدارس العربیہ پاکستان کے تحت سالانہ امتحانات کا آغاز بروز ہفتہ دو شعبان 1446ھ مطابق یکم فروری 2025ء سے ہونگے۔جو مسلسل چھ روز تک جاری رہیں گے۔میڈیا کوآرڈینیٹر وفاق المدارس العربیہ مولانا طلحہ رحمانی نے سالانہ امتحانات کے تفصیلی اعداد و شمار جاری کئے،جس کے مطابق امسال مجموعی طور پر چھ لاکھ پچیس ہزار چھ سو اٹھائیس (625628) طلباء وطالبات ریکارڈ تعداد میں امتحان میں شریک ہونگے۔گزشتہ سال کی نسبت اکتیس ہزار اٹھتہر (31078) شرکائے امتحان کا اضافہ ہوا۔ایک لاکھ آٹھ ہزار چار سو تین (108403) طلباء وطالبات حفظ قرآن کا امتحان دیں گے۔جس میں نواسی ہزار چار سو چھتیس (89436) طلباء اور اٹھارہ ہزار نو سو سڑسٹھ (18967) طالبات شریک امتحان ہونگی۔شعبہ تحفیظ کا امتحان پچیس جنوری سے تیس جنوری تک ملک بھر میں منعقد ہونگے۔جس کیلئے سیکڑوں امتحانی مراکز قائم کئے گئے ہیں جبکہ مجموعی طور پر ڈھائی ہزار سے زائد ممتحنین و ممتحنات امتحان لیں گی،جن کی تقرری کردی گئی ہے اور ان کی تربیتی نشستوں کا آغاز اگلے ہفتہ سے ملک بھر میں ڈویژنل و اضلاع کی سطح پر ہونگے۔وفاق المدارس نے عالمی سطح پر ایک سال میں سب سے زیادہ حفاظ و حافظات کے اپنے ہی عالمی ریکارڈ میں اضافہ کیا۔یکم فروری سے شروع ہوکر چھ فروری کو اختتام پذیر ہونگے۔درجات کتب میں مجموعی طور پر آخری درجہ عالمیہ (مساوی ایم اے) میں بیالیس ہزار چار سو انسٹھ (42459) طلباء و طالبات امتحان دیں گے۔جس میں بارہ ہزار دو سو ستائیس (12227) طلباء اور تیس ہزار دو سو بتیس (30232) طالبات شامل ہیں۔درجہ عالمیہ کے امتحان میں کامیاب ہونے کی صورت میں علماء و عالمات کی سند سے نوازا جائے گا۔دو سالہ شارٹ ڈپلومہ کورس جو دراسات دینیہ کے نام سے ہے اس میں مجموعی طور پر انتیس ہزار چھ سو بیاسی (29682) طلباء و طالبات شریک امتحان ہونگے۔جبکہ تجوید للحفاظ و الحافظات اور تجوید للعلماء و العالمات میں مجموعی طور پر پندرہ ہزار تین سو بیالیس (15342) علماء و طلباء بھی سالانہ امتحان میں شریک ہونگے۔مولانا طلحہ رحمانی نے امتحانی مراکز اور نگران عملہ کے اعداد وشمار کی تفصیلات بھی جاری کیں،جس کے مطابق مجموعی طور پر تین ہزار پانچ سو انسٹھ (3559) امتحانی مراکز قائم کئے گئے ہیں۔مجموعی طور پر گزشتہ سال کی نسبت شرکائے امتحان میں اضافہ کے تناسب سے تین سو باون (352) سینٹرز کا نمایاں اضافہ ہوا ہے۔ایک لاکھ تریسٹھ ہزار دو سو پچپن (163255) طلباء کیلئے نو سو پچیس (925) امتحانی مراکز ہونگے جبکہ تین لاکھ ترپپن ہزار نو سو پچاس (353950) طالبات کیلئے دو ہزار چھ چونتیس (2634) امتحانی مراکز قائم کردئیے گئے ہیں۔مجموعی طور پر تین ہزار پانچ سو انسٹھ (3559) امتحانی مراکز کیلئے بیس ہزار چھ سو اٹھاسی (20688) نگران عملہ کی تقرری عمل میں لائی گئی ہے،گزشتہ سال کی نسبت چار ہزار تین سو ننانوے (4399) امتحانی نگران عملہ کا بڑا اضافہ کیا گیا ہے۔ان امتحانی مراکز میں طلباء کیلئے قائم نو سو پچیس (925) میں چھ ہزار پانچ سو تیس (6530) نگران عملہ متعین کیا گیا ہے جبکہ طالبات کے دو ہزار چھ سو چونتیس (2634) امتحانی مراکز میں چودہ ہزار ایک سو اٹھاون (14158) خواتین معلمات کی نگرانی پر تقرری کی گئی ہے۔مولانا طلحہ رحمانی کے مطابق مجموعی طور شعبہ تحفیظ کے علاؤہ درس نظامی اور دیگر جن درجات کا امتحان ہوگا ان کی تعداد مجموعی طور اکیس (21) ہے۔ملک بھر میں وفاق المدارس کے تحت شعبہ تحفیظ اور درجات کتب کے امتحانی عملہ کی تربیتی نشستوں کا نظم بھی حسب سابق طے ہوگیا ہے جس سے اراکین امتحانی کمیٹی،اراکین عاملہ اور مسؤلین نظم امتحان پر رھنمائی میں حصہ لیں گے۔نیز مرکزی دفتر وفاق المدارس کے منتظمین امتحانی امور کیلئے فعال ہیں جبکہ صوبائی دفاتر میں امتحانی نظم کیلئے کنٹرول روم بھی قائم کردئیے گئے ہیں۔