چیئرمین پاکستان کرکٹ بورڈ محسن نقوی سے ہاکی لیجنڈز شہباز سینئر اور خواجہ جنید کی ملاقات

راولپنڈی۔(نمائندہ خصوصی):چیئرمین پاکستان کرکٹ بورڈ(پی سی بی) محسن نقوی سے ہاکی لیجنڈز شہباز سینئر اور خواجہ جنید نے ملاقات کی اور آئی سی سی چیمپئنز ٹرافی ٹورنامنٹ پر ان کے اصولی موقف کو سراہا، سابق اولمپئنز نے کہا کہ جس طرح آپ نے کرکٹ سٹرکچر تیزی سے درست کیا ہے، اسی رفتار سے ہاکی کے سسٹم کو ٹھیک کرنے کی ضرورت ہے۔ملاقات میں ہاکی کے کھیل کے فروغ کے لیے پائیدار بنیادوں پر اقدامات پر تبادلہ خیال کیا گیا۔ چیئرمین پی سی بی نے ہاکی کے کھیل کے لئے ہر ممکن تعاون کی یقین دہانی کرائی۔ محسن نقوی نے کہا کہ ہاکی پاکستان کا قومی کھیل ہے اور پاکستانی ہاکی ٹیم کا ماضی درخشاں تاریخ سے عبارت ہے، ہاکی کی عظمت رفتہ کی بحالی کے لیے پورا تعاون کریں گے۔سابق کپتان شہباز سینئر اور خواجہ جنید نے چیئرمین پی سی بی کو جرمن اور نیدرلینڈز کے ہاکی کلبز کے دورے کی تفصیلات سے آگاہ کیا جبکہ مارچ میں جرمن نیشنل جونیئر ہاکی ٹیم کے دورہ پاکستان کے بارے بریف کیا۔