بلاول بھٹو زرداری کی کراچی پریس کلب کے نومنتخب عہدیداروں کو مبارکباد

کراچی۔(نمائندہ خصوصی)پاکستان پیپلز پارٹی کے چیئرمین بلاول بھٹو زرداری نے کراچی پریس کلب کے نومنتخب عہدیداروں کو کامیابی پر مبارکباد دی ہے۔ میڈیا سیل بلاول ہاوَس سے جاری بیان کے مطابق پی پی پی چیئرمین نے اپنے تہنیتی پیغام میں نومنتخب صدر فاضل جمیلی، جنرل سیکریٹری محمد سہیل افضل، جوائنٹ سیکرٹری محمد منصف، خزانچی عمران ایوب سمیت گورننگ باڈی کے تمام کامیاب ارکان کے لیے اپنی نیک تمناوَں کا اظہار کیا ہے۔ انہوں نے کراچی پریس کلب کے سالانہ انتخابات میں دی ڈیموکریٹس پینل کی شاندار کامیابی پر پینل کے ذمہ دارن کو بھی مبارکباد دی ہے۔چیئرمین بلاول بھٹو زرداری نے کراچی پریس کلب کی شاندار جمہوری روایات کو سراہتے ہوئے کہاکہ یہ ہم سب کے لیئے باعثِ فخر ہیں۔ کراچی پریس کلب ملک میں آزادی اظہار کا ایک مضبوط قلعہ رہا ہے۔ انہوں نے اس امید کا اظہار کیا کہ کراچی پریس کلب کی نئی قیادت صحافتی برادری کو درپیش چیلنجز کا جرات اور عزم کے ساتھ سامنا کرتے ہوئے آزادی صحافت کے تحفظ کی میراث کو آگے بڑھائے گی۔ انہوں نے اعادہ کیا کہ پاکستان پیپلز پارٹی غیر متزلزل عزم کے ساتھ صحافی برادری کے جائز حقوق و موقف کی حمایت کرتی رہے گی۔ انہوں نے زور دیا کہ ملک میں آزاد اور ذمہ دار صحافت کا فروغ ہماری قوم کی ترقی اور خوشحالی کے لیے ضروری ہے