چیئرمین جوائنٹ چیفس آف اسٹاف کمیٹی جنرل ساحر شمشاد مرزا کی دورہ کویت کے دوران شیخ صباح الخالد الحمد الرحمٰن سے ملاقات

راولپنڈی ۔(نمائندہ خصوصی):چیئرمین جوائنٹ چیفس آف اسٹاف کمیٹی جنرل ساحر شمشاد مرزا، نشان امتیازنے دورہ کویت کے موقع پر شیخ صباح الخالد الحمد الرحمٰن سے ملاقات کی ہے۔پاک فوج کے شعبہ تعلقات عامہ (آئی ایس پی آر) کی جانب سے جاری پریس ریلیز کے مطابق جنرل ساحر شمشاد مرزا نے دورہ کے دوران کویت کے ولی عہدمبارک الصباح،پہلے نائب وزیر اعظم شیخ فہد یوسف الصباح، وزیر دفاع و داخلہ لیفٹیننٹ جنرل (اسٹاف) انجینئر ہاشم الرافی، انڈر سیکرٹری کویت نیشنل گارڈ شیخ عبداللہ مشعل الصباح، انڈر سیکرٹری وزارت دفاع اور میجر جنرل صباح جابر الصباح اور کویت کی مسلح افواج کے قائم مقام چیف آف اسٹاف سے بھی ملاقاتیں کی ہیں۔اعلیٰ سطحی ملاقاتوں میں دوطرفہ امور اور دفاعی تعاون پر تبادلہ خیال کیا گیا، فریقین نے اپنے مشترکہ وعدوں کا اعادہ کیا اور دفاع اور سلامتی کے شعبوں میں باہمی فائدہ مند تعاون کے لیے نئی راہیں تلاش کرنے کی اہمیت پر زور دیا۔جنرل ساحرشمشادمرزانے العبداللہ جوائنٹ کمانڈ اینڈ سٹاف کالج کا بھی دورہ کیا، جہاں انہیں اکیڈمی میں ہونے والی تربیتی سرگرمیوں کے بارے میں بریفنگ دی گئی۔قبل ازیں چیئرمین جے سی ایس سی کےکویت پہنچنے پر چاق و چوبند دستے نے ان کو گارڈ آف آنر پیش کیا۔