اسلام آباد۔(نمائندہ خصوصی):سعودی عرب کی شوریٰ کونسل کے چیئرمین ڈاکٹر عبداللہ بن محمد بن ابراہیم الشیخ اعلیٰ سطحی پارلیمانی وفد کے ہمراہ اسلام آباد پہنچ گئے۔
سپیکر قومی اسمبلی سردار ایاز صادق نے ایئرپورٹ پر معزز مہمان کا استقبال کیا۔ اس موقع پر بچوں نے شوریٰ کونسل کے چیئرمین کو گلدستہ پیش کیا۔سپیکر قومی اسمبلی سردار ایاز صادق نے کہا کہ آپ کے دورہ پاکستان پر دلی مسرت ہوئی،پاکستان سعودی عرب کے ساتھ اپنے دیرینہ، برادرانہ تعلقات کو انتہائی قدر کی نگاہ سے دیکھتا ہے، دونوں ممالک ہر مشکل وقت میں ایک دوسرے کے شانہ بشانہ کھڑے رہے ہیں۔سردار ایاز صادق نے کہا کہ سعودی عرب کی شوریٰ کونسل کے چیئرمین کا دورہ پاکستان دوطرفہ پارلیمانی رابطوں کو فروغ دینے میں اہم پیش خیمہ ثابت ہو گا۔چیئرمین سعودی مجلس شوریٰ کونسل نے کہا کہ پاکستان کا دورہ کر کے انتہائی خوشی ہوئی، پرتپاک استقبال پر سپیکر قومی اسمبلی کا مشکور ہوں، دورہ پاکستان کے دوران ہمیشہ خلوص اور محبت ملی ہے۔سعودی شوریٰ کونسل کے چیئرمین ڈاکٹر عبدالله بن محمّد بن ابراہیم الشیخ، سپیکر قومی اسمبلی سردار ایاز صادق کی دعوت پر پاکستان کا دورہ کر رہے ہیں ۔ سعودی شوریٰ کونسل کے چیئرمین پاکستان میں اپنے قیام کے دوران سپیکر قومی اسمبلی کے علاوہ صدر مملکت، وزیراعظم پاکستان، چیئرمین سینیٹ اور دیگر سیاسی رہنماؤں سے علیحدہ علیحدہ ملاقاتیں کریں گے۔سعودی شوریٰ کونسل کے چیئرمین کے دورہ پاکستان کو انتہائی اہمیت دی جارہی ہے۔سعودی شوریٰ کونسل کے چیئرمین کے دورہ پاکستان سے پارلیمانی روابط کو فروغ حاصل ہو گا۔
