امریکی قونصل جنرل کرسٹن ہاکنز کا گورودوارہ ڈیرہ صاحب کا دورہ ، اقلیتوں کے حقوق کے تحفظ اور مینارٹی کارڈز کے اجرا پر تبادلہ خیال

لاہور۔(نمائندہ خصوصی):صوبائی وزیر اقلیتی امور رمیش سنگھ اروڑہ کی خصوصی دعوت پر پاکستان میں امریکہ کے قونصل جنرل کرسٹن ہاکنز نے ایمبیسیڈر بلوم کے ہمراہ منگل کو یہاں گورودوارہ ڈیرہ صاحب لاہور کا دورہ کیا۔دورے کے دوران انہوں نے گوورودوارے کا معائنہ کیا اور مذہبی رسومات کی ادائیگی کے بارے میں تفصیلی معلومات حاصل کیں۔قونصل جنرل اور صوبائی وزیر کے درمیان ملاقات میں پاکستان کی موجودہ صورتحال پر بھی تبادلہ خیال کیا گیا۔ ملاقات کے دوران اقلیتی برادری کے حقوق اور ان کی فلاح و بہبود کے لیے اہم امور پر بات چیت کی گئی خاص طور پر”مینارٹیز کارڈ” کے جلد اجرا کے حوالے سے تبادلہ خیال کیا گیا تاکہ اقلیتی برادری کو شناخت اور دیگر حقوق کے حوالے سے سہولت فراہم کی جا سکے۔کرسٹن ہاکنز نے اس موقع پر کہا کہ امریکہ پاکستان کی اقلیتی برادری کے حقوق کے تحفظ کے لیے ہر ممکن تعاون فراہم کرنے کے لیے تیار ہے اور اس نوعیت کے دورے دونوں ممالک کے درمیان تعلقات کو مزید مستحکم کرنے میں معاون ثابت ہوں گے۔رمیش سنگھ اروڑہ نے امید ظاہر کی کہ یہ دورہ پاکستانی اقلیتی برادری کے مسائل کے حوالے سے امریکی حکومت کے عزم کو ظاہر کرتا ہے اور اقلیتی حقوق کے تحفظ کے لیے مزید اقدامات کی جانب ایک اہم قدم ثابت ہوگا۔ رمیش سنگھ اروڑہ نے وفد کو خوشی اور احترام کے طور پر سکھوں کی ثقافت میں تحفے کے طور پر پیش کی جانے والی چادر اورسروپے بھی پہنائے۔