وزیراعلیٰ مریم نواز چین کے دورے میں عوامی فلاح و بہبود کے تاریخی معاہدے کررہی ہیں:سیکرٹری اطلاعات پنجاب طاہر رضا ہمدانی

لاہور( نمائندہ خصوصی) سیکرٹری اطلاعات و ثقافت پنجاب سید طاہر رضا ہمدانی اور ڈی جی پی آر غلام صغیر شاہد نے کالم نگاروں سے ملاقات کی اور انہیں وزیرعلیٰ پنجاب مریم نواز کے دورہ چین پر بر یفنگ دی۔ انہوں نے بتایا وزیر اعلیٰ مریم نواز چین کے دورے کے دوران عوام کی فلاح و بہبود کے لیے تاریخی معاہدے کررہی ہیں۔وزیراعلی پنجاب نے نوازشریف کینسر اسپتال کے لئے بھی معاہدہ کیا ہے۔ وزیراعلی کے دورہ چین کے ثمرات آنے والے دنوں میں صوبہ پنجاب کی عوام کو ملیں گے۔انہوں نے کہا کہ پنجاب میں اسموگ کے خاتمے کے لئے بھی چین کے ساتھ ملکر کام کرنے پر اتفاق ہوا ہے۔ پنجاب میں سکولوں کی سطح پر آرٹیفیشل انٹیلیجنس کو فروغ دینے کیلئے وزیراعلی پنجاب نے چین کی کمپنیوں کے دورے کئے ہیں۔ پنجاب کے سکولوں میں اے آئی پر کام شروع کرنے پر جلد پیش رفت ہوگی۔ڈی جی پی آر غلام صغیر شاہد نے بتایا کہ اخبارات کو اشتہارات کی منصفانہ تقسیم اور میڈیا کو مسلسل ادائیگیوں کا سلسلہ تیزی سے جاری ہے۔ گزشتہ دور حکومت کے التواء شدہ واجبات دستاویزات مکمل ہونے پر ادا کردیے جائیں گے۔ انہوں نے کہا کہ چھوٹے اور بڑے اخبارات کو مکمل منصفانہ انداز میں اشتہارات دیے جارہے ہیں۔ ادائیگیاں جو زیر التواء ہیں انہیں اگلے دو ماہ تک مکمل کرلیا جائے گا۔ ملاقات میں سینئر صحافی مجیب الرحمٰن شامی،ارشاد عارف، جمیل اطہر، نجم ولی، صوفیہ بیدار، پرویز بشیر، واصف ناگی، خالد جاوید جان، عرفام اطہر، اعجاز حفیظ خان، بیدار سرمدی، نثار بشیر، خادم حسین، ناصرہ عتیق، حامد ولید، فیاض ملک، شفقت حسین، سلمان ملک، لبنیٰ ظہیر، طارق حمید، یوسف عباسی، لطیف چوہدری،آصف عفان، سہیل قیصر، جویریہ بنت ربانی، ربیعہ رحمن اورعیشا پیر زادہ بھی ملاقات میں موجود تھے۔ کالم نگاروں نے مریم نواز کے دورہ چین کے دوران کینسر ہسپتال اور سولر پینل اور دیگر منصوبوں کے بارے میں مفاہمت کی یاداشتوں کو سراہا اور وزیراعلیٰ پنجاب مریم نواز کے لیے تجاویز بھی پیش کیں۔